Shillong, Naitung 9 : U Symbud Myntri Rangbah ba khmih ïa ka Tnad Urban Affairs u Ma Sniawbhalang Dhar ha ka sngi Balang, ula pyntip ba ka kam ban pynkynriah ïa ki dukan madan kala sdang mynta na Khyndailad, da ka jingthmu ban lah pynïaid beit ïaid ryntih ïa ki kali bad pynthikna ïa ka ïaid ka ïeng ba kylluid ki paidbah.
Haba ïakren bad ki nongthoh khubor, u Ma Sniawbha ula ong ba ka Sorkar ka dang pynkhreh ruh ban shim rai halor ki parking lot, kiba la dep ithuh ha bun ki jaka kynthup ka jaka ba marjan ka Secretariat bad Motphran.
Kat kum ka jingong jong u, ka thong ka long ban lah pynïaid beit ïaid ryntih ia ki kali bad ka ïaid ka ïeng ba kylluid ïa ki paidbah.
Haba kylli,u Ma Sniawbha ula pyntip ba ka Sorkar kam shym la leh experiment ïa ka jingpynïeng kali hynrei kala pyntreikam da ka aiñ, da ka jingdon jong ka parking policy.
U iathuh ba bun ki parking lot la pyntrei mynta bad palat 1000 tylli ki kali la khmih lynti ba kin ïoh jaka pynïeng. Katto katne ki jaka pynïeng kali la khmih lynti ba kin sa dep noh shen kynthup kawei kaba don marjan ka Secretariat, Motphran bad ha ïew Polo.
U pyntip ba ka Myntri pla tyngka ka Ri la khmih lynti ba kan plie ïa ka ïew Polo lashai ka sngi ha ka por 3:30 baje janmiet.
