Watla ka Election Commision of India kam pat pynbna satia ïa ka tarik ban pynlong ïa ka elekshon shiteng samoi ha Gambegre Constituency hynrei ki seng saiñpyrthei ki la sdang ban khohreh ban wad kyrtong kum ka jingpynkhreh ban pynïakhun ïa ka elekshon.
Ka elekshon shiteng samoi kan sa long ha Gambegre hadien ba u Saleng A. Sangma u la iehnoh kam kum u MLA hadien u la jop ïa ka elekshon MP ba dang shu dep long shen ha Tura Parliamentary Seat da kaba pynliem lyndang ïa ka Agatha Sangma kaba long ka Sitting MP jong ka Tura.
Dang shen, ka National Peoples Party (NPP) Meghalaya State Unit ka la sdang ban shong ïa ka jingïalang bad ki nongïalam ba hakhmat jong ka party na ka bynta ban ïathir ïatai bad ban pyrkhat sani ïano ban sei kum u lane ka kyrtong ha ka elekshon shiteng samoi ha Gambegre.
Ka jingshah rem jong ka NPP ha Tura ha ka elekshon Lok Sabha ka la ktah bha ïa ka party namarba ka NPP ka dei ruh kaba bat ïa u lakam synshar mynta ha jylla hadien ba ka la jop kham bun ki MLA ha ka elekshon sha ka Ingdorbar Thawaiñ ka jylla kaba la long ha u snem 2023. Ka NPP kam poi pyrkhat satia ba ki paidbah kin pynkylla ïa ka rai ha kane ka khyllipmat kaba mynta hadien ba ki la shaniah beit ban sei ïa ki nongïalam ba kynsai na ka ing ka sem jong u Purno A. Sangma. Ka jingshah rem jong ka NPP ha ka elekhson Lok Sabha ka long kum ka jingïuhtdong bseiñ kaba pynkyndit lut ïa ki paidbah nongshong shnong ha ka jylla namarba kim poi pyrkhat ba kat ka khun jong u Purno A Sangma uba ki paidbah ka rilum Garo ki ieid bad ki ñiew burom bha, kan shah rem khlem poi pyrkhat ha ka jingïakhun ïa ka elekshon.
U James PK Sangma uba dei u hymmen rangbah jong u Myntri Rangbah ka Jylla u Conrad K. Sangma ula mad ïa ka jingshah rem ha ka elekshon sha ka Ingdorbar Thawain kaba la long ha u snem 2023 bad mynta ka kynti sa ka para kynthei ruh ka la mad ïa ka jingshah rem ha ka elekshon Lok Sabha. Kum ban shu phaidien biang, wat u Conrad Sangma ruh u la mad ïa ka jingshah rem ïa ka elekshon sha ka Iingdorbar Thawaiñ ka Jylla ha u snem 2013.
Haba bishar hi ïa ka jingrem bad ka jingjop elekshon jong kine ki lai ngut shipara ka dei hi na ka rai jong ki paidbah ba ki la bishar ïa ki kam ba ki la leh manla ki san snem bad ka jingkylli mynta ka long hato ki paidbah kin dang shaniah neem ïa ka NPP ha ka elekshon shiteng samoi ka ban sa long ha Gambegre.
Dang ha ki khyndiat taiew, ka khubor hamsaïa ka la her stet ba ki nongkyrshan jong ka NPP na rilum Garo ki la tyrwa ban pynieng ïa ka Dr. Mehtab Chandee Sangma ka kurim jong u Conrad Sangma ha kane ka elekshon.
U Conrad Sangma uba dei ruh u National President jong ka NPP u la kam ba kam shym la don kano kano ka jingïapher jingmut hapoh ka party ha kaba ïadei bad ka jingtyrwa ïa ki kyrteng jong ki kyrtong ban pynïakhun ha ka elekshon shiteng samoi na Gambegre.
Ym tang ka NPP, hynrei wat ïa ka BJP ruh ka la sdang ban wad kyrtong na rilum Garo ban pynïakhun ha ka elekshon shiteng samoi. Lehse lada ka BJP kam ïoh kyrtong, ha ka lad kaba khatduh, ka lah ban pynieng da u MDC ka Tura u Bernard N. Marak.
Haduh mynta hi kaba dang jar jar dei ka Trinamool Congress bad ka Indian National Congress ki bym pat aidak eiei ïano kin sei kyrtong ban pynïakhun ha ka elekshon shiteng samoi.
Watla u Saleng Sangma um shym la long shuh u MLA jong ka Gambegre hynrei lehse un wad beit da u paralok uba ïajan bha ban pynmih bujli ïa ka jaka jong u na Gambegre kaba u la mihkhmat naduh u snem 2013 haduh ba un sa resaiñ.
