Sdang pan jingkyrshan ka CoMSO na ki seng sain pyrthei ban pyntrei kam ïa ka SIR bad ST Order

Shillong, Ïaiong 03: Ka Confederation of Meghalaya Social Organisation (CoMSO) ha ka sngi Palei, kala sdang ïa ka jingialap ban pan jingkyrshan na baroh ki 60 ngut ki MLA lyngba ki seng sain pyrthei ka Jylla ban pyntreikam ïa ka Special Intensive Revision (SIR) jong ka electoral roll bad ban pynkylla ïa ka Constitution (Scheduled Tribes) Order, 1950, ha Meghalaya.
“Ngi la ai ka por ba 45 sngi ïa ka Sorkar Jylla ba kan shim ïa ka sienjam ha kaban thoh sha ka Home Ministry, Election Commission of India bad kiwei ki bor khmih halor kine ki kam” ong u Chairman ka CoMSO Bah Roykupar Synrem hadien ka jingialang bad u President ka BJP Rikman G Momin ha ka sngi Palei.
U Bah Roykupar ula ban jur ïa ka jingdonkam ban ïakren bad baroh ki kynhun ba don bynta, kynthup ki seng sain pyrthei.
“Ngin sa leit ïakren ïa man ki seng sain pyrthei, bad ïakynduh markhmat lane phah da ka shithi, ban pan jingkyrshan na ka bynta kine ki kam ba kongsan kiba ktah ïa ki riewlum trai muluk ka Jylla” ula ong.
Ka BJP Meghalaya kala ai ka jingkular ïa ka CoMSO ba ka don ha kajuh ka jingkwah haba ïadei bad ka jingpyntreikam ïa ka SIR bad kan sa ïakren bad ki bor ba dei khmih.
“Kin sa pule bniah ïa ka dorkhas jong ngi bad kin sa shim ïa ka sienjam ba donkam ha kaba ïadei bad ka jingpynkylla ïa ka ST Order” la bynrap u Bah Roykupar.
Ka CoMSO kala pdiang sngewbha ruh ïa ka jingkren u Myntri Rangbah ka Jylla Conrad K Sangma ba kyrshan ïa ka SIR hynrei ban jur ïa ka jingdonkam ban shim ïa ki sienjam ha kaban pyntreikam ïa ka.
“Kam dei ban kut tang ha ka jingkren, hynrei ban leh ruh da ka kam” ong u Bah Roykupar.