Shillong, Naiwieng 22: Ka Hynñiewtrep Youths’ Council (HYC) ka la dawa na ka sorkar jylla bad ka Assam ban sdang da ka jingtohkit ba laitluid halor ka jingjia ha u snem 2022 ka jingjia ïasiat ha shnong Mukroh.
Ha ka kyrwoh ba la phah ha ka sngi Saitjaiñ, u President ka HYC u Bah Roy Kupar Synrem u la pynrem ïa ka jingbym don ka jingmut jingpyrkhat bad kumjuh ruh ka jingleh bym kheiñ briew ba la leh da ki pulit ka Assam kaba la wanrah ka jingïap ki mynsiem balui lui bad kaba pynheh ruh ïa ka jingïakajia ha shilynter jong u pud u sam ka Assam-Meghalaya.
“Ha kane ka jingdap kaba 3 snem jong kane ka jingshah pynïap jong ki nongshong shnong ba lui lui ha shnong Mukroh, ngi pynrem jur bad ngi dawa ïa baroh artylli ki sorkar jylla ba kin shim kam da kaba shai, kaba laitluid bad ban tohkit halor kane ka jingjia bad ban pynpaw paidbah ïa kaei kaba ki la shem bad ba kim dei satia ban pynslem,” ong u Bah Synrem.
Ka HYC ka la kyntu ïa kine ki ar sorkar ba kin pynshitom ïa kito kiba donkti halor kane ka jingjia shah pynïap ki mynsiem kiba lui lui bad ban wanrah noh ïa ka suk ka saiñ hapdeng kine ki artylli ki pud ki sam jong ki jingïakajia pud bad ban lah ban kiar noh na kine ki jingjia ha ki por ban wan.
Wat hadien 3 snem bad wat hapdeng ka jingïamynjur ban phah tohkit laitluid kaba kynthup da ka Central Bureau of Investigation (CBI), ka jingtohkit kam pat long kaba hun.
“Ngi kyntu ïa ka sorkar Meghalaya ban shim noh ïa ki sienjam ban pynthikna ban pyndep pura ïa kane ka jingtohkit bad ba kiba leh ïa kane ka kam runar kin shah pynshitom kham kloi katba lah,” ong u Bah Synrem.
