Nongpoh, Naiwieng 13: Ka jingshimkhia jong ka bor district Ri-Bhoi ban kyntiew ïa ki kam thaiñ jaiñ khamtam ban kyrshan ïa ki longkmie ban ieng hala ki jong ki kjat kala nang ai mynsiem shuh shuh ïa ki longkmie kiba ju im da ka kam thaiñ jaiñ ha ka district hadien ba la mang ban plie haduh 30 tylli ki jaka thir ksai ne ki Eri Silk Spinning Centre ki ban don ruh kumba 254 tylli ki mashin.
Ïa ka jingplie ïa kitei ki centre la sdang shuwa mynta ka sngi na ka shnong Umkynsier kaba hap ha Jirang Constituency lyngba ka C&RD Block bad katei baroh ka urlong dei namar ka jingshimkhia jong ka bor district ha ka jingïatreilang bad ka MSRLS ryngkat ka jingkyrshan jong ka Oil India Corporation Limited (IOCL) lyngba ka skhim CSR.
Ïa katei ka Eri Silk Spinning Centre ha Umkynsier, la wan ban plie paidbah da u Bah Sosthenes Sohtun Myntri ka tnad C&RD ka sorkar jylla kum u konggsan ha ka jingdonlang u Abhilash Baranwal Deputy Commissioner ka Ri-Bhoi District, u Mukesh Ranjan, Executive Director ka IOCL, u Raja Brahma, Project Director ka DRDA, u Dr. P Hajong, BDO Jirang Block, ki riew rangbah, ki longkmie na ka shnong Umkynsier bad kiwei kiwei.
Na ka liang u DC ka Ri-Bhoi lem bad u Mukesh Ranjan Director ka IOCL haba kren ha kane ka sngi kila ong ba ïa kitei ki 30 tylli ki centre yn shna lyngba ka skhim CSR na ka bynta ban ïarap khamtam ki shnong nongkyndong ban kan long kawei na ki lad ban kyntiew bad aikam aijam sha kito ki longkmie bad ki samla kiba ju thir ksai.
U Bah Sosthenes Sohtun haba kren kum u kongsan u la ai ka jingïaroh ïa ka jingshimkhia jong ka bor district ban pynïoh ïa kitei ki centre ryngkat ka jingïatreilang bad ka MSRLS bad ka IOCL bad kane ka long shisha ka jingkyrkhu bad ka jingmyntoi kaba khraw ïa ki longkmie khamtam ha katei ka centre kin don ruh ki jaka thir ksai da ki mashin ki ban pynsuk bad pynkloi shibun ïa ki longkmie.
U la ong ruh ba bun hi na ki longkmie ha Ri-Bhoi ki dang leh beit da ka rukom barim ban thir ksai da ka kti, hynrei mynta ka sngi kan kham pynsuk ïa ki bad kham pynsted ruh namar ka jingdon ki mashin ki ban ïarap ïa ki ban pynsted bad pynkloi ïa ka kam bad kyrmen skhem ruh ba katei ka jaka thir kan long ka jingmyntoi ban kyntiew ïa ki longkmie ha ki shnong nongkyngdong lyngba ka kam thir bad thaiñ, u la bynrap.
