Sdang mih ki nongtrei Sorkar ban leit sha ki Polling Station ba kham jngai ha EKH

Shillong, Rymphang, 19: Ka jingpynkhreh ïa ka elekshon jong ka Khasi Hills Autonomous District Council (KHADC) na ka bynta ki 17 tylli ki Constituency ha East Khasi Hills ka la ïaid shaid shaid.
U Additional Deputy Commissioner (ADC) ka East Khasi Hills District Ronnie Lyngdoh ha ka jingïakren bad u nongthoh khubor ha ka sngi Balang, u la ïathuh ba 13 tylli ki Constituency la leh na ISBT, Mawiongrim, mar ar tylli la leh na Sohra Civil Sub-divison bad na Pynursla Civil Sub-division.
“Ka jingpynkhreh ka long kaba janai na ka liang jong ngi ban pynbiang nadong shadong na ka bynta ki nongtrei kiba hap leit sha ka kamram elekshon sha ki Polling Station bapher bapher,” la ong u Bah Wahlang.
U la ïathuh ba ki nongtrei kiba leit sha ki kamram elekshon ki dei kiba la ïoh ïa ki jingshah hikai pyntbit ban pyndep ïa ka kamram ba ka Sorkar ka la bynshet na ka bynta ban pynïaid ïa ka elekshon na ka bynta ka Mawsynram, Mawkynrew bad Nongkrem Constituency ki la mih mynta ka sngi Balang.
U la ïathuh ba ki nongtrei ba la bynshet ban pynïaid ïa ka elekshon ha ki 720 tylli ki Polling Station kin sa mih lashai ka sngi Palei.
U la pyntip ruh ba la pynbiang ïa ka Postal Ballot Cell ha kaba ki nongtrei sorkar kiba dei ban leit sha ki Polling Station ki la pyndep lypa ïa ka jingthep vote ban jied ïa ki nongthawaiñ sha ka KHADC.
Ha kajuh ka por u la pyntip ba la pynbiang ruh ïa ka Medical Cell ban ai jingsumar ïa ki nongtrei lada ki don kano kano ka jingshitom ha ka bormet bad shwa ba kin leit sha ki Polling Station.
U la ïathuh ba ladep ban pynbiang ïa ki kali ki ban leit on ïa ki nongtrei kiba leit sha ki Polling Station bad ban leit buh ruh sha ki shnong ba ki shong ki sah ynda ki la leit buh ïa ki EVM Machine ha ka Strong Room khnang ba kan ym don kano kano ka jingthud ha ka leit ka wan jong ki.
Halor ka jingpyntreikam ïa ka Model Code of Conduct (MCC) ba la pyntreikam naduh ka 27 tarik, Kyllalyngkot, 2025 ka ban sa kut ha ka 24 tarik Rymphang, 2025 kam shym la don kano kano ka jingpynkheiñ. “Ngi pynpaw ïa ka jingsngewnguh ïa ka DC kum ki Returning Officer bad ki Assistant Returning Officer kiba peit ïa ki 13 tylli ki Constituency hapoh ka East Khasi Hills bad kumjuh ruh ïa ki seng saiñpyrthei halor ka jingïaid beit ïaid ryntih bad kam shym la don kano kano ka jingpynkheiñ ïa ka Model Code of Conduct,” la bynrap shuh shuh u Bah Wahlang.