Shillong, Naiwieng 20 : U Adviser ka tnad Social Welfare ka Jylla, Bah Paul Lyngdoh ha ka sngi Palei u la ïathuh ba ka tnad ka la ïoh pdiang ïa ki jingtip ba mynta ki nongkhaïi drok ki la pyndonkam sa da ki khynnah ban leh ïa ki kam khaïi drok ha nongbah Shillong.
“La ïoh pdiang ïa ki jingtip halor kine. Kadei ka jingjia kaba i shyrkhei haduh katta katta bad dei na kane ka daw ha ka jingïalang bad u SP ka ANTF la ïa kren bun kiei kiei namar ka long kaba donkam ban don ka jingïatrei lang kaba jan bha bad ki pulit ka jylla, ka distrik bad ka ANTF ryngkat ki nongshong shnong,” u la ong haba kren bad ki lad pathai khubor hadien ba la wai ka jingïalang.
U Bah Paul u la ong ruh ba kum ki nongshong shong kim dei ban ong ba kane ka jingma kan ym ktah ïa ki namar khatduh kin ym lah ban tip lada kim treilang ba ïoh u paramarjan ba sah syndah ïing bad ki u dei pynban u nongkhaïi drok. “Kumta, lada kum ka shnong hi kam mih shakhmat kan dei kaba eh bha ban iakhun.”
Ha kajuh ka por u Bah Paul ula ïathuh ba ha kane ka sngi, ka Nongsohphoh Upper Mawprem ka la mih shakhmat ban thaw ïa ka Village Defence Party kaba 12 ha nongbah Shillong.
“Phi lah ban mutdur ba ka nongbah kaba don kumba 6 lak ngut ki nongshong shnong ka don pat tang kattei tylli ki shnong kiba snohkti lang ha ka jingïakhun pyrshah ïa u drok na ka jylla,” u la bynrap shuh shuh.
Shwa kane, u Bah Paul u la ïathuh ba ki la ïoh pdiang ruh ïa ki jingtip kiba thymmai ba mynta ki nongdie drok ki la pyrshang wat ban die pyllein pyllein ïa u drok ha ki jaka paidbah (open market). La ïathuh ba la kyntu ruh ban kynduh ïa u SP jon gka Distrik ban wanrah ka jingïatrei lang kaba jan bha hapdeng ki ANTF bad ki pulit namar ka jingkhia jong ka kam.
Shuh shuh u la ïathuh ba ha ka jingïalang la ïa kren ruh ba nangne shakhmat ki ANTF kin leit ruh ban khynra bad don ha kito ki jaka bym pat ju don mynshwa khamtam ha kito ki jaka ba kham long ïew kum ha ki bynta jong ka Motphran.
Nangta, u la ïathuh ruh ba ki la don bun ki jaka kiba la paw kum ki jaka ba jyllei bha u drok kynthup naduh ka Mawlai. U Bah Paul u la ong ba mynta lei lei jan baroh ki distrik ha ka jylla ki la ngop lut ha u drok. Hynrei u ong pat ba ka Shillong bad ka East Jaintia ki paw hakhmat eh ha ka thup namar kiba bun eh ki nongdih drok ki dei na Shillong kaba dei ka nongbah jong ka jylla katba ka East Jaintia pat ka dei ka jaka rung jong u drok.
