Sdang kylla long thliew ka surok ha Garikhana, syrtok ki kali ba ïaid na kane ka surok manla ka sngi

Shillong, Naitung 14: Ka jingbym lah jong ka tnat badei peit ban maramot pynbha ïa kiba bun ki surok kiba la sniew ha kiba bun ki jaka ka la wanrah ka jingeh kaba khraw bha ïa ki kali kiba ïaid na kine ki surok bad kumjuh ruh ki paidbah kiba ïaid ba ïeng bad kiba pyndonkam ïa kine ki surok.
Kawei na ki surok kaba la sniew bad kylla long pung ha ki jaka jaka, kadei ka surok kaba ha Garikhana, Shillong, ha kaba kane ka surok ka la sdang ban jot rathai bad sniew kaba la ktah bha ïa ki kali kiba pyndonkam ïa kane ka surok.
Ka jingsniew bad kylla long thliew jong ka surok ïaid kali kaba la ïohi ba ki la long kum ki pung dohkha barit barit, kaba na Garikhana, Shillong ka ban mih sha Khasi Hills Autonomous District Council ka la ktah bha ïa ka ïaid ka ïeng jong ki kali manla ka Sngi.
Kane ka surok ïaid ki kali kaba lah sniew bad bun sa tang ki thliew kiba lang um, kadei kaba lah sniew mynta lah bun bnai, hynrei ym shym la ïohi satia ba kan don ka jingwan ban maramot da ka tnat badei peit, ïa kane ka surok.
Kawei ruh na ki daw kumba la ïohi, kadei ka jingtuid kaba khlem sangeh ka um napoh ki nala ba lah sahkut da ki jaboh jabaiñ bad ki ñuit ki ñier bad kane ka jingsniew kane ka surok ka la ktah bha ïa ka jingïaid ki kali bad kumjuh ruh ïa ki paidbah kiba kam na Shilliang surok bad kiba thmu ban leit thied jingthied napoh Ïewduh, kiba ju ngat ha ki jingshah kynshait ne shah synreit da ka um ktieh, khamtam ha ka por ba ki kali ki ïaid ne ñiah sted na kane ka surok ba la pong thliew.