Nongstoiñ, Risaw, 09: Ka shnong Myndo Umkyllaiñ ka la khang noh shi syndon ïa baroh ki briew kiba ju mlien ban leit jngohkai sha ki lum ki btap jong ka shnong. Ka daw jong ka jingkhang ka dei halor ka nongrim ba la don katto katne ki briew ki bym shym la burom bad kohnguh ïa ki kyndon shnong.
Bunsien haba la pyrshang ban pynsngewthuh da ki briew shnong, la ju mih pynban da ki jingklumar kat haduh ba ka shnong ka la hap ban tuklar bad ban shim kam ban bishar. Kum kine ki jingjia ka la wanrah jingeh shibun ban teh lakam ïa kita kiei kiei baroh, ong u bah Halmingstone Marthong sordar shnong Myndo Umkyllaiñ.
Ha u kyrwoh khubor, la ong ba ha kitei ki lum ba itynnad haba ki briew ki leit jngohkai ki ju pynjaboh ïa ka Mei Mariang, da kaba bret pathar ïa ki plastik, ki bilor kyiad bad kiwei kiwei ki tiar ba pyndonkam ha ki jingdih pynbuaid, ha kaba ki khun shnong ki la hap ban lum ban lang ïa kita ki jaboh jabaiñ man ka sngi.
Ym tang katta hynrei ïa kitei ki jaka la pynkylla ruh wat kum ka ktem awria, namar la ju don kiba leit ha kitei ki lum pyngngad ban leh ïa ki kam ba isaitmet, kumta katei ka jingleh jong ki ka la pynjah burom ruh wat ïa ka shnong ka thaw baroh kawei, ong utei u Sordar ka shnong Myndo Umkyllaiñ.
Kum ban shu pyntip ba ka shnong Myndo Umkyllaiñ ka don ha ka thaiñ Urkali, kawei na ki shnong ha ka thaiñ Nongstoiñ West Khasi Hills District. Ka dei kawei na ki shnong kaba don ïa ki lum kiba itynnad bad kiba ïasyriem ïa ki lum ka Mawlangkhar kaba lah ban leit jngohkai pyngngad, pynban kam pat dei satia ka jaka jngohkai kaba la ithuh da ka sorkar. Hynrei, ka dei ka nongkynti jong ki riew shimet bad kaba dang hap hapoh u pud u sam jong ka shnong Myndo Umkyllaiñ.
Halor kitei ki kynrum kynram, ka Dorbar Shnong ka la shim ïa ka rai ban khang noh shisyndon ïa baroh ki briew. Nangne shakhmat ka shnong kan ym shah shuh ban leitkai ha kitei ki lum pyngngad pynban kan pyllait tang ïa kiba la ïoh jingbit na ka shnong.
Lada don kino kino kiba ïaid lait ne pynkheiñ kyndon shnong, ka shnong hi kan ym shim kano kano ka jingkitkhlieh lada jia kiei kiei kiba pynsngewsih, ong ka kyrwoh lyngba u sordar shnong Myndo Umkyllaiñ.
