Ka jingwan u khlam Covid-19 bad ka jingkhang dam (lock down) ki skul baroh kawei ka ri ha kine ki ar(2) snem tam ba la dep ka la sdang paw pyrthei ka jingktah kaba khraw ïa ki khynnah skul mynta u snem.Bun ki skul ki la ïa ud paidbah lut ïa ka jingbym lah ne phiel (fail) kput ki khynnah ha man la ki klass ba ki pule wat tang ha kane ka Examination shiteng snem(Half yearly Examination)ruh.Ki nonghikai ha ki skul bapher bapher ki la ia lyngngoh ïa ka jinghiar kynsan ka jingpule ha ki khynnah.Ki kmie ki kpa bad wat ki khynnah hi ruh ki la sha ïong hi ngaiñ ïa ka jingbym ler ne phiel kput bym lah mutdur mynta ka Exam shiteng snem jong une u snem 2022.
Ka daw bah dawsan jong kane ka jingphiel(fail) ki khynnah hi kadei na ka jingktah jong u Covid-19 bad ka jingkhang dam(lock down) ïa ki skul ha kine ki ar(2) snem kynthih,kata,ha u snem 2020 bad 2021.Ki khynnah kiba shong klass X mynta,kidei kiba dang shong class VIII ha u snem 2020 bad kim ïoh jinghikai satia ïa ka course/ syllabus jong ka klass VIII ha utei u snem.Kumjuh ruh,ha u snem 2021 ba ki shong klass IX ruh kim ïoh jinghikai satia hynrei bun la shu pynkiew klass(promoted) tang da ka jingsngew synei(special consideration) ne la shu pynkiew klass da ka jingmaham(passed with warning).Dei kane ka jingpynkiew klass jubor ha u snem 2020 bad 2021 kaba la ktah kylla pynban ïa ki khynnah skul khamtam kito kiba shu pdeng ne kham duna ha ka jingnang – jingstad jongki.
Kane ka la jia ruh ïa kiwei kiwei ki klass kum ki klass IX,VIII,VII bad kumta ter ter. Ka jinghikai lyngba ki mobile ne Online Klass ha kine ki ar(2) snem(2020-21) ruh ka la ktah bad pyn jaituh bad pynalhia shisha shisha ïa ki khynnah.La lap lyngba ka jingtynjuh(Test) ba ki khynnah ki ïoh mark cent per cent ne 20 na ka 20 marks lada ai test lyngba ka Online klass hynrei ynda la long skul pat, mar ïa leh(conduct) da ka Offline Test ha ki classroom jongki pat kim ler ei ei.Ki juh ki khynnah kiba la ïoh cent per cent ne 20 na ka 20 ha ka Online Test ki ia ioh pynban tang 02 ne 03 wat lada la ai ne set da kijuh ki jingkylli ïa ki.Dei hangne keiñ ba la lap noh ïa ka jingbym ler ne ka jingktah jong ka Online klass.Lada kane ka rukom Online klass ka dang ïai bteng sa katto katne snem,ka thoh ka pule kan poi syndon shaduh nurok ka ksew. Kane ka jingktah ka pule puthi ha ki khynnah skul ym dei satia ban shu kheiñ kai.Ki skul,ki nonghikai lem bad ki kmie ki kpa kidei ban ïashimkhia bha ïoh sep ei ka jingnang jingstad bad ka lawei ki khynnah pule.Ka sorkar ruh kam dei ban shim sting halor kane.Ka dei ban ban tip bad sngewthuh lem(aware/alert) ïa kane ka jinghiar kynsan ka thoh ka pule mynta u snem.Lada shu ïa sngap jar jar ne shu ieh noh kumto katba jia katba long,ka lah ban wanrah pynban ka jingtim kaba khraw ha ki snem kiban wan ha la liang ka thoh ka pule bad ka jingnang jingstad jong ka pateng ban wan(next/new generation).
