Sdang kiew ki kam jngohkai naduh ba la pynlong ïa ki Concert kynhun tem, ong u Bah Paul

Shillong, Rymphang 17: U Myntri kam jngohkai ka sorkar jylla Bah Paul Lyngdoh ula ong ba ki kam jngohkai pyrthei ha jylla ki la kiew bha naduh ba ka jylla ka la sdang ban pynlong ïa ki concert jong ki kynhun tem bapher bapher ha ka jylla.
Haba pynkynmaw ïa ka jingsdang wan jong ki concert ha Meghalaya, u Myntri ka jylla u la ong, “Ngi sdang ïa kane naduh u snem 2004, ha shuwa ban don ka jingpyrkhat ban kyntiew ïa ka ïoh ka kot na ki concert. Mynta, ki nongpynïaid bad ki nongrwai ne ki kynhun tem ki pynbor dalade ba dei ban kynthup lang ïa ka Shillong kum ka jaka ban pynlong ïa ki concert. Kane ka dei ka sienjam kaba khraw bha ban kyntiew ïa ka kam jngohkai ka Meghalaya bad ka kam ïaput ïatem ha kane ka jylla”.
Ha kaba iadei bad kane u Myntri ula pynpaw ïa kane haba kren sha ki lad pathai khubor halor ka jingjop jong ka concert u Ed sheeran haba ban jur ïa ka jingkongsan ba ka wanrah na ka bynta ka kam ïarwai ïatem bad ki kam jngohkai ha Meghalaya
“Kumba phi tip, u Ed Sheeran u don ha ka kyrdan ba-ar ha ka pyrthei mynta, bad ka jingkren hakhmat u paidbah ban ong ba kane ka dei ka concert ba bun paid eh bad ki paidbah kiba sngewtynnad eh na ki concert ba ula pynlong ha India ka pyni ba ka Shillong, ka don ïa ka snam, ban long ka Nongbah ka ïaput ïatem kaba heh bha,” ong u myntri ka sorkar jylla.
Haba kylli balei ba ïa ki concert la jied ban pynlong nongkong eh ha Shillong bad Umïam ban ïa kiwei kiwei ki jaka hapoh ka Jylla, u Bah Paul ula ong, “U dang pynjanai suki suki ïa ki jingdonkam baroh ha kylleng ka jylla, yn pynbiang ïa ki surok ha ki jaka kyndong, pynbun ïa ki iingbasa, pyntrei ïa ki jingtei kiba donkam bad kiwei kiwei. Haduh mynta, ki nongrwai ne kynhun tem ba la wan tem ki jied ïa ki jaka kiba biang lut nadong shadong ki jingdonkam”.
Haba kren halor ka jingwan ki paidbah sha ka concert, u Bah Paul ula ong, “Hapdeng 30,000 haduh 35,000 ngut ki briew kila wan sha ka concert u Ed Sheeran. Katba ngi dang lum ïa ki jingkheiñ halor ka jingwan ki briew ba nabar, ki trai ïing basa ki la shongshit bha. Ha ka sien ba nyngkong, ki nongwan kai ki la wan sha jylla wat ha kine ki bnai Kyllalyngkot bad Rymphang ba duna ki nong wan kai”.
Ban pynthikna ba ki nongwankai kin pynjlan ïa ka jingsah hangne wat hadien ka concert, u Myntri ula ong ba ka Tnad Jngohkai ka la thaw ïa ki lad ki lynti mynta. “Ha ka jingsurvey jong ngi ka pyni ba ha ryngkat ka concert u Ed Sheeran, kiba bun ki nongwankai kila sah ha Jylla ban leit sa sha ka concert u Mr.Big kaba long hadien shisngi. Kiba bun ruh kila leit kai sha Sohra, Dawki bad Umïam. Da ka jingkynshew ba palat T.4000 klur ha ki kam jngohkai, ngi khmih lynti ïa ka jingkylla kaba khraw ha kine ki arsnem ban wan,” ula ong.
Haba phaikhmat sha ki por ban dang wan, u Myntri ula kren halor ki sienjam ba ka Sorkar ka la shim ban pyntrei ïa ki jingtrei bapher bapher. “Ka jingpynleit jingmut jong ngi mynta ka long ban pynjanai ïa ki jingtei ha ki kam jngohkai. Ka Ropeway Project ka la don ha lynti, bad ngi la pynïasoh ïa kiba bun ki jaka jngohkai ban pynshlur ïa ki nongwan kai ba kin leit ïuhkjat ha bun tylli ki jaka. Ngi la nang pynïar ïa ka map jngohkai ban kynthup ïa ki jaka jngohkai ba dang shu shem thymmai khnang ba kan pynsngewtynnad ïa ki nongwankai”.