Sdang ki jingïalehkai U-17 Boys, jam ka U-15 sha ka semi final

SHILLONG, Jylliew 04: Ka lympung ïalehkai District Level Inter School Subroto Mukherjee Cup Football Tournament 2025′ bala pynïaid da ka ophis treikam u District Sports Officer (DSO) East Khasi Hills District, ka la jam shakhmat ha ka sngi kaba lai, ha kaba ki jingïalehkai la pynlong ha Madan Heh-Mawlai bad ha SAI, NEHU Campus.
Ha ka kyrdan Under-15 jong ki khynnah shynrang, ka Assam Rifles Public School, ka St.Anthony’s Hr.Sec.School, ka O.M.Roy Memorial Hr.Sec.School bad ka Umphyrnai Presbyterian Sec.School ki la jam shakhmat ha ka semi final hadien ba ki la jop ïa la ki jong ki jingïalehkai Quarter final ha Mawlai-Madan Heh.
Ha ka jingïalehkai ka Assam Rifles Public School ka la pynliem noh ïa ka DonBosco Hr. Sec. School da 5 kol, kine ki kol la thep da u Irungbam Yaiphaba Meitei (8), John Wandon Nongsiej (9), Lalhmimgma wia (13) bad u Lazarus Pohthmi (21,48’).
Ka St.Anthony’s Hr.Sec.School ka la pynliem noh ïa ka Shillong Vidhyalaya Sec.School da 3-0 kol (ki kol la thep da u Habankara Blah (7’), Silasson Sawkmie (11’) & Khaigoumang Malouda (14’).
Ka O.M.Roy Memorial Hr.Sec.School ka la pynliem ïa ka Sacred Heart Boys Hr. Sec. School da 5-3 ha ka tie breaker hadien ba ïakhaid khlem don ba pynkhihjar ha ka jingïalehkai.
Ka Umphyrnai Presbyterian Sec.School ka la jop da 2-1 kol ïa ka H.Elias Memorial Hr. Sec. School. U Bankyrshanbor Kharkongor (40’) bad u Aibannangkhraw kharumnuid (44’) ki la thep na bynta ka Umphyrnai, katba u Sannaky Nongsiej (25’) u la thep na bynta ka H.Elias.
Kumta ka Assam Rifles Public School kan aireng pyrshah ïa ka St.Anthony’s Hr.Sec.School, katba ka O.M.Roy Memorial Hr.Sec.School kan ïakhun pyrshah ïa ka Umphyrnai Presbyterian Sec.School ha ka semi final ban long mynta ka sngi (05 tarik Jylliew, 2025) ha Mawlai, Madan Heh.
Haba phai pat sha ka wat ïakhun ba nyngkong jong ki khynnah shynrang Under-17 kaba dang shu sdang hynne ka sngi Balang ha SAI, NEHU Campus, la sakhi ïa ka Shillong Vidhyalaya Sec. School kaba la pynliem ïa ka St.Peter’s Sec. School da 3-0 kol. Ka RamaKrishna Mission School ka la jop da 1 kol ïa ka Malki Presbyterian Sec. School.
Ha ki jingïalehkai kiba bud, ka Rev.T.J.Jones Presbyterian Sec.School ka la pynliem ïa ka Shon Roy Basan Sec. School da 1 kol, katba ka Don Bosco Hr.Sec. School ka la pynliem da 1-0 kol ïa ka Weiloi Sec.School.
Kumta baroh 4 tylli ki kynhun kiba jop ki la buh jaka ïalade ha ka Pre-Quarter final ka ban sdang naduh 06 tarik Jylliew. Ki jingïalehkai ba dang sah na bynta ka 1st Round jong ki Under-17 Boys ki long, Govt U.P.S. Mawryngkneng pyrshah ïa ka Sawmer Presbyterian S.School, nangta ka St Gabriel’s Hr.Sec.school pyrshah ïa ka Mawngap D.C.M.H.S.S, bad khatduh ka Grace Academy Sec. School pyrshah ïa ka
St. John, Bosco Boys Hr.Sec.School.
Haba phai sha ki kynthei, ki ban ïakhun ïa ka semi final ki long, ka Tyrsad Hr. Sec. School pyrshah ïa ka Mawngap D.C.M. Hr. Sec. School, nangta ka Sacred Heart Boys’ Hr. Sec. School pyrshah ïa ka Iewrynghep Sec. School.