Shillong, Jylliew 13: Ka Forest Department jong ka KHADC mynta ka la sdang ban khynra sa ïa ki Furniture ne ki dukan kiba shna da ki tiar dieng kum ki shuki, ki miej, ki jingkhang, ki synduk metïap bad kiwei kiwei halor ka nongrim ba kim shym la ïoh NOC na ka District Council.
Katkum ka jingïathuh ki trai ba don ki dukan Furniture, la ong ba ki briew kiba la kam ba kidei na ka tnad Forest jong ka KHADC ki la wan sha ki dukan jong ki ban ai da ki Show Cause Notice sha ki trai Furniture wat kiba don i dukan iba tang shi kamra ruh ba kidei ban jubab hapoh 15 sngi balei ba ym dei ban khang noh ïa ki dukan jong ki haba kim shym don ïa ka NOC na ka KHADC.
Ka shithi ba la sam sha ki trai Furniture ba la soi sa da u Chief Forest Officer, ka ong ba baroh ki Furniture kidei ban da ioh NOC na ka KHADC haba ki plie ne sdang ïa ki dukan jong ki. Lym kumta lada kim lah ba jubab hapoh 15 sngi da ka jingthoh ka District Council ka leh katkum ka aiñ.
Hynrei kiba la ïoh ïa kane ka Show Cause Notice ki la pynpaw ka jinglyngngoh ba kane ka Notice kam shym la kdew pat mynno la pynmih ïa ka Notification ba ki paidbah kin tip ba hap donkam ban ïoh NOC na ka District Council ban sdang ïa kane ka kam jong ki. Ki la ong ba ha ka jingshisha ma ki lei ki dei ki nongtrei na ki dieng kiba ki thied na ki Karkhana ot dieng. Nalorkata ki la ong ba kane ka kam kadei kaba ki trei ban ïeng ha la ki jong ki kjat. Nalorkata ka long ruh ka jingïarap ïa ki paidbah nongkyndong kiba donkam ïa ki shuki, ki miej bad khamtam eh ki synduk met ïap ha ka por ba kyrkieh. Ki don ruh kiba la lah ban aikam aijamïa ki samla ki bym donkam donjam. Hynrei kaba kham lyngngoh ka long ba ki don kiba la buh dukan lah da ki bun bun snem, ym ju don ba wan kylli ne ong ba donkam ban ïoh NOC shuwa na ka District Council. Hynrei mynta kynsan kynsan ki la shu wan ai da ka Notice kaba long kum ka jingbyrngem ïa ki ba ki hap ban ai da ka jingthoh hapoh 15 sngi. Ki la ong ba jin kin da la wanrah da ka Notification kin jin da la aplai ïa kata ka NOC na District Council.
