Nongstoiñ, Jylliew, 25: Ka KSU Maweit Area Unit hapoh ka jingïalam u Samla Aiborlang Diengngan Secretary, mynta ka sngi ka la leit ban ai jingthoh ha u Syiem ka Hima Nongstoiñ haba ïadei bad ka jingsdang ban kharoi ka jingsniew hapoh ka ïew Maweit.
La ong ba ka seng ka la ïoh ïa ka jingujor na ki ba bun balang bad ka la sngewïahap ban leh ei ei ban khanglad ïa ka jingsniew ha ka thaiñ, namar ha katei ka ïew kiba ïaid ba ïeng ki la sdang ban syier mynsiem namar ba la bun satang ki nongdie bad ki nongdih kyiad.
Ka seng ka la ong ba da lei lei kan ym ailad ba ka ïew Maweit kan kylla long kum ka ktem ki jingsniew. Na ka liang jong u Syiem u la ai ka jingïaroh ïa ka seng kaba la ïohi bad shimkhia ïa katei ka phang. U la kular ruh ba na ka liang ka ophis jong u ruh un leh ïa kaba donkam.
