Sdang kem tlot u Chairman Green Tech ba shah thngan, rai pat ban bteng haduh ban da pyndam ïa ka contract

Shillong, Ïaïong 10: U Chairman ka Green Tech u Bah H B Nonglang ha ka sngi Thohdieng u la sdang ban kem tlot hadien ba ka jingsdang ka jingshah thngan jong u kaba la sdang naduh ka step Sngi Palei haduh ha Sngi Thohdieng ka la iaid la palat 24 kynta.
U Bah Nonglang ha ryngkat lang bad kiwei ki para dkhot nalor kiwei pat kiba la leit ban ai mynsiem ki la sdang ïa ka jingshah thngan kaba khlem pud naduh ka sngi Palei ban pyrshah ïa ka jingthmu ka sorkar ban phah tei ïa ka resort and spa hapoh Dewlynnong Lumpongdeng ha Umïam.
U Bah Nonglang ha ka jingdonlang u Secretary General u samla Ritre Lyngdoh bad kiwei ki la ïai bteng ban banjur ïa ka Sorkar ba katba kam pat pyndam noh ïa ka jingai contract ban tei ïa ka resort and spa hapoh Dewlynnong Lumpongdeng kin ym sangeh ka jingshah thngan wat haduh ban da ïap.
Ki la ïathuh ruh ba naduh ba la sdang ka jingshah thngan bad haduh mynta ba la sdang kem tlot u chairman ym pat don kiba wan khmih na ki bor ai jingsumar Sorkar ban khmih halor ka koit ka khiah jong u chairman bad kiwei pat kiba la ïashah thngan lang.
Ki la ong ba ka Tnat Jngohkai pyrthei bad ka Sorkar kadei ban shim jingkitkhlieh lada jia eiei ïa u chairman jong ki.