New Delhi Nailur 03 : Ka Tnad Pynroi jaka nongkyndong jong ka sorkar pdeng ka la sdang ban shna surok na ka bynta ka jingmyntoi jong ki jaitbynriew riewlum (Particularly Vulnerable Tribal Groups) ha Manipur.
Ka jylla Manipur ka la ïoh 8 tylli ki projek surok hapoh ka Pradhan Mantri Janjati Adivasi Nyaya Maha Abhiyan (PM-JANMAN), ka bynta hapoh ka Pradhan Mantri Gram Sadak Yojana. Kine ki surok – kiba jrong 35.22 KM – hapoh ka bynta jong ka jingpynïasoh surok jong ka PM-JANMAN, ha kaba la antad ba ka jingbei tyngka kan long T. 40.03 klur, yn shna ha ka jylla.
Kane ka sienjam ba kongsan kan pynbiang ka jingpynïasoh surok ba lah ban pyndonkam ha ka jinglong ba kumno kumno ruh jong ka suiñbneng sha phra tylli ki jaka sah jong ki PVTG ha ka jylla, kan kyntiew ïa ka imlang sahlang jong ki jaitbynriew kiba kham shah ktah (PVTG) kiba sah ha ka jylla, kan kyntiew ïa ka jingpynïasoh ha ki jaka nongkyndong, kan pyndap ïa ka jingduna hapdeng ki shnong ba jngai bad ki jaka sor, kyntiew ïa ka ïoh ka kot, ka khaiï pateng ha ka thaiñ. Ka kyntiew ruh ïa ka jingïoh ïa ki jingshakri ba kongsan kum ka koit ka khiah, ka pule puthi, bad ki ïew ki hat, ka plie ïa ki lad ïoh kam bad kyntiew ïa ka ïoh ka kot ha ka thaiñ, nalor ka jingïadei bad ka jingthmu jong ka sorkar ba ka thaiñ shatei lam mihngi kan long kaba la kiew shaphrang bad ka ri India kaba la kiew (Viksit Bharat).
Ki projek kiba don hapoh ka PM-JANMAN kin don ka jingktah kaba pynkylla ïa ka thaiñ, ban ïarap ïa ka jingkiew shaphrang bad jingriew spah jong ki kynhun riewlum ha ka thaiñ shatei lammihngi bad ban pynskhem ïa ka jingangnud jong ka Sorkar na ka bynta ka roi ka par kaba kynthup ïa baroh.
