Shillong, Iaiong 6 : Ka thma saiñ pyrthei hapdeng u Dr Mukul Sangma uba ïalam ïa ka All India Trinamool Congress (AITC) ha ka jylla bad u Myntri Rangbah u Conrad K Sangma uba ïalam ïa ka National Peoples’ Party (NPP) ka la sdang khie mynta ha ri lum Garo namar ha ka Lah Sngi U Blei u Conrad u la leit ïuhkjat ha ka hima jongu Dr Mukul ha Ampati bad pynbna ba ka Ampati Degree College yn kynthup noh ha ka People’s College Grant in Aid Scheme jongka sorkar jylla. Ym tang ba u pynbna ban pynngat ïa ka college ha kane ka skhim hynrei ula ai ruh ka jingïaroh ïa ka College kaba la ai ka jingshakri hok ha katei ka thaiñ.
Ha kajuh ka sngi u la leit ruh sha Chapahati kaba ha South West Garo Hills hi bad sam ïa ki cheque sha ki 41 tylli ki kynhun jong ki nongrep kiba ïasynrop bad ïatrei lang ba la kot 28 klur tyngka. Nalor kane ha ka Sngi Ba Ar u la sam jingïarap ruh sha ki 30 tylli ki kynhun ne Farmer Producer Groups jongka prokram FOCUS ha Denaminggre, East Garo Hills. “ Ka jingthrang jong ngi ka long ban wanrah ka jingïoh nong arshah ne lai shah ïa ki nongrep lyngba kane ka skhim ne prokram. Ka FOCUS Ka buh thong ban ïarap haduh 4.5 lak tylli ki kynhun nongrep hapoh ka jylla.
Ha kane kajuh ka jaka u la plie ruh ïa ka jingkieng kaba 165 M kaba nalor ka wah Simsang bad Kampil kaba la tei haka jinglut ba 2.35 klur. Na kane ka jingpynlut 1.59 klur ka dei na ka skhim MGNREGS., 25 lak na ka IBDLP bad 51.07 lak na ka tnad PWD.
U la plie maw nongrim ruh ban shna ïa ka surok Rongrenggre-Darugre ha East Garo Hills kaba dei ka jingbei pisa ka World Bank. Ka jingmang ban pynlut ïa kane ka surok ka la kot sha ka 75.69 klur tyngka.Bun ruh kiwei kiwei ki kam pynroi na ka skhim MGNREGS u la plie ha kane ka jingwan jngoh jongu ïa ka East Garo hills.
