Nongpoh, Naiwieng 13: Ka taiew lehkmen ba shi taiew jong ki samla pule ka Ri Bhoi Synod College ha Umsaitsning ka la sdang noh mynta ka sngi lyngba ka prokram kaba shongkun bad kaba pynsgewkmen ïa kiba bun ki samla pule kane ka College ha kaba nalor ka jingpule ki la ioh lad ruh ban sei madan ïa ki sap bapher bapher ha kane ka taiew lehkmen ki samla pule ha kane ka taiew lehkmen ne ka College week.
Kum ban ai mynsiem ïa ki sama pule kane ka College, haba plie pyrda ïa kane ka taiew lehmen la wan ruh ban plie pyrda da u MLA ka Umsning, u Dr. Celestine Lyngdoh kum u kongsan ban ai mynsiem ïa ki samla pule kane ka College shuwa ba kin shim bynta ha ki prokram bapher bapher hapoh kane ka Colleg week.
La sakhi lang ruh ha kane ka sngi da ka jingdon lang u Vice Principal ka College, u Rev. Precious Tmung, u Bah Franky Nongrum, rangbah Shnong ka Lad Mawrong, Umsaitsning, u Bah Rocky Marwein kum u riew rangbah bad kynthup ki samla pule bad ki nonghikai jong katei ka College.
Haba ai jingkren ha kane ka sngi, u Dr. Celestine Lyngdoh u la pynpaw ïa ka mynsiem jong ka jingkmen ban ïa don bynta ha kane ka sngi ba la plie pyrda ïa ka taiew lehkmen ki samla bad u kyrmen skhem ruh ba lyngba kane ka taiew lehkmen ki samla pule kan ai jingmyntoi shibun eh ïa ki samla pule ba kin ioh ban shim bynta ha ki prokram bapher bapher.
Kum u nongmihkhmat paidbah, u Dr. Celestine Lyngdoh u la ai ruh ki kyntien sneng ki kyntien kraw ne ban ai mynsiem ïa ki samla pule, ba nalor ka jingpule ki donkam ruh ban don kum kine ki jaid prokram ban shim bynta lane ban sei madan ïa ki sap ki phong ba ki don bad wat la katta ruh kum ki samla kim dei pat ban klet ïa ka jingpule ha kaba ha kane ka juk stad ba mynta ka jingnang jingstad ka long shisha kaba kordor ha baroh ki liang jong ka jingim, u la bynrap.
Lyngba jong kane ka sngi ba la plie pyrda ïa ka College week, ki bor pynïaid ka College ryngkat ki samla pule ki la sdang ban pynlong ïa ki jaid prokram bapher bapher ba la wan shim bynta shitrhem da ki samla pule ka Ri Bhoi Synod College kaba dei kawei na ka College kaba la mih thymmai ha Ri Bhoi, da ka jingangnud ban kyntiew ïa ka pule ka puthi ki khun samla ha Ri Bhoi bad khamtam ban kham phai khmat na ka bynta kito ki samla pule kiba wan na ki longïing baduk ba kyrduh.
