Jowai, Risaw 20: Ka East Jaiñtia Hills District Football Association (EJHDFA) ha ka Lah Sngi U Blei (20 tarik Risaw) ka la ïoh ban sdang ïa ka lympung phutbol ha ka kyrdan Super Division Football Tournament-2025, kaba la tip kum ka 5th Kyrmen Shylla Contribution Trophy ha madan Artificial Turf, Diengshynrum, Khliehriat.
Ha ka sngi sdang ïa kane ka lympung la ïadon ryngkat lang ki nongïalam dkhot nongkitkam jong ka EJHDFA nalor ki riew ïeit phutbol jong katei ka thaiñ.
Hynne ka sngi la ïoh ban pynlong ar tylli ki jingïalehkai ha kaba ka Rymbai Shkenshynriah SC bad ka Chiehruphi SYWSC ki la sdang ïa ka samoi ïakhun jong ki da ka jingjop.
Ka jingïalehkai kaba nyngkong la ïohi ïa ka Rymbai Shkenshynriah SC kaba la wanphai nadien ban pynjemkhnap da 5-1 kol ïa ka Thangskai Tiger SC.
Tang hapoh 2 minit ba la ïaid ka kylla step u Suting Syrti u la pynkhih ïa ka kol kaba nyngkong na ka bynta ka Thangskai Tiger, hynrei ka jingïalehkai kaba kyrpang jong u Ribiang Dkhar ka la pynkylla dur ïa ka jingïakhun, ha kaba u la thep marwei baroh san tylli ki kol (30, 39, 44, 49, & 90+4) ban ai ïa ka Rymbai Shkenshynriah ïa ka jingjop ha ka jingïakhun kaba nyngkong.
Nangta ha ka jingïakhun kaba ar ka Chiehruphi SYWSC kala jop da tang 1-0 kol ïaka Shilliang Umshong SC. Hadien ka jingïakhun kaba khlem kol ha ka kylla step, ka Chiehruphi SYWSC ka la pynkhih ïa ka kol kaba kongsan tam lyngba u Rigenncy Lapasam haka minit ba 82.
Ka jingïakhun ha kane ka sngi Ba-ar, 21 tarik Risaw 2025, kan long hapdeng ka Lad-Rymbai-B SC pyrshah ïaka Dhana CSC, nangta kan bud sa ka jingïakhun hapdeng ka Sutnga SSCC pyrshah ïaka Diengshynrum SC.
