Sdang ka ‘Skills Meghalaya’ ban ai jinghikai haduh 1 lak ki samla ka jylla ha ki san snem

Jowai, Jymmang 13: Ka sorkar jylla lyngba ka Megha laya State Skill Development Society (MSSDS) kaba hap hapoh ka Labour Department kala sdang ïa ka program kaba ai kyrteng ka ‘Skills Meghalaya’ bad ka thong jong kane ka program kaba san snem ka long ban ai jinghikai haduh shilak ngut ki samla ha ki sap trei kiba pher bapher. Ha kane ka snem ka sorkar kala don ka jingthmu ban ai jinghikai haduh 20,000 ngut ki samla ha baroh kawei ka jylla.
Mynta ka sngi ka Society of Urban and Rural Empower-ment (SURE) kaba long ka seng kaba la empanelled da ka MSSDS ban long kum kawei na ka Skill Training Provider (STP) hapoh ka jylla kala sdang ïa ka training haka laiñ Integra-ted Farming haka shnong ïalong.
Kane ka dei ka sien kaba nyngkong ba ka Skill Meghalaya kan pynlong ïa ka training hapoh ka West Jañtia Hills Distrik. Ka training halor ka ‘Integrated Farming’ kala buh ïaka shnong Ïalong haka kyrdan kaba kyrpang kum ka shnong kaba nyngkong ha kaba kum kane ka training la pynlong na kane naka projek.
Haba kren lamkhmat haka jingïalang ban plie ïa kane ka training u Dr H.H.Mohrmen ula ïathuh ïa ki kam ba ka seng ka la trei kum ka FOCUS, ka Link Workers Scheme bad kiwei kiwei. Ula ong ruh ba ha kaba ïadei bad ka ‘Integrated Farming’ ka seng kala pynlong mynshuwa ïa kaba kum kane ka training ïa kaba la bei pisa da ka Asian Development ha ki lai tylli ki shnong, ka Wahïajer, ka Ksehrynchang bad Moosakhia.
Haka jingkren pdiang sngewbha ïa ki nongïa shim bynta baroh ha kane ka training na u ma T Ram Phawa uba long u Waheh Shnong jong ka shnong Ialong uba la ai ka jingïaroh ïa ka SURE ba ka la lah ban wan rah ïa kum kane ka training khnang ba ki nongshong shnong kin lah ban pynheh bad pynjanai ïa ka jingtrei kam jong ki.
Ula ban jur ruh ïa ki Self Help Group (SHG), ki Village Organisation (VO) bad ki Producer Groups (PG) ba kin trei bha khnang ba kin lah ban plie biang ïa ka ïew rud surok (lay bye market) kaba don harud ka surok bah haka shnong Ïalong. Ula kyntu ruh ïa ki nong shah training ba kin ym dei ban pep ïa ka training khnang ba kin ïoh lut baroh ki jait training.
Ha kane ka jingïalang la ïoh ruh ïa ka jingkren na u ma Lambor Suchen uba dei u Skill Development Officer na ka office Meghalaya State Skill Development Society (MSSDS). U ma Suchen ula ïathuh shaphang kiba bun ki jait training kiba la pyntreikam da ka MSSDC ïa kiba la ïarap pyntreikam da ki seng treimon sngewbha kum ka SURE.
Namar kumba long mynta ka shnong Ïalong ka don haruh ka surok bha bad ban ka don ka Tourist Spot ha kane ka shnong, ula kyntu ruh ba ki nongshim training ba kin shimkhia ïa ka training khnang ba kin lah ban pymih ïa ki mar kiba ki lah ban die ha kine ki jaka. Katba ïa ki kyntien ai khublei la ai da ka kong Sngi Dhar kaba long ka Presideng jong ka VO jong ka shnong Ïalong.