Shillong, Jymmang 10: Ka Siangkhnai SC kala sdang ka jingïaid lynti jong ka da ka nam jop ha ka lympung ïalehkai Green Hills Football Tournament ba pynïaid da ka Mawjatap Sport and Cultural Club. Ïa kane ka lympung la sdang ha ka 6 tarik Jymmang 2022 ha madan ïalehkai jong ka shnong Mawjatap bala wan ban ïashim bynta da 16 tylli ki sports club jong ka dong ka thaiñ.
Ïa kane ka tournament bala noh syniang da ka ophis jong u Disrict Sports Officer ka East Khasi Hills bad katto katne ki riew shimet la wan ban plie pyrda da u Sumit Roy uba dei u khlieh duh jong ka Axis Bank bad Branch Manager ka Axis Bank Shillong kum u kongsan ha ka jingïadonlang ki Sordar Shnong jong ki shnong kiba marjan, nangta la donlang ruh u Bah Ham Singh Suting Chief Organiser ka Mawkynrew Cup Committee bad kiwei kiwei.
Haba kren kum u kongsan u Sumit Roy u la ai khublei bad ïaroh ïa ki nongpynïaid kiba la kloi ban shim ïa kane ka lynti ban kyntiew ïa ka sport ha kane ka thaiñ bad ai khublei ruh ïa baroh ki club kiba la wan ban ïashim bynta bad ha kajuh ka por u la ïaroh ruh ïa u Bah Banteidor Lyngdoh MLA jong ka thaiñ bad kumjuh ruh ïa ki paidbah.
Ula ai khublei kitbok kitrwiang ruh ïa baroh ki nongïashim bynta bad ïa kito kiba la don kti ban pynlong ïa kane Tournament, da kaba kyntu ruh ïa ki ba kin ïalehkai bha da ka mynsiem kum ki nongïalehkai ba shisha bad ban nang kiew shaphrang, khatduh u kongsan u la pynbna ruh la plie ïa ka Green Hills Football Tournament 2022.
Ha ka jingïalehkai kaba itynnad bad ïakhaid bha, ka Siangkhnai SC kala khur jingjop da kaba pynliem da 1-0 pyrshah ïa ka Mawsna SC.
