Nongpoh, K’Lyngkot 17: Kum ka jingplie paidbah ïa ka Taïew Lehkmen jong ka shnong, kaba la tip kum ka “Umdihar Week 2026”, ka Seng Samla Shnong Umdihar haka sngi Saitjaiñ ka la sdang noh ïa ka lympung jingïalehkai Badminton, kaba long kum kawei na ki prokram ba kongsan jong kane ka jinglehkmen.
La ong ba ka jingpynlong ïa kane ka jingïalehkai ka dei ka lad ban pynjan ïa ki samla ka shnong, ban tei ïa ka jingïatylli hapdeng ki para samla, bad ruh ban plie rynsan ïa ki khun samla ba kin pyni ïa ki sap jingïalehkai Badminton.
Ïa kane ka sngi sdang la wan ban sakhi da u Pastor Precious Timung kum u kongsan, u ba dei ruh u Principal jong ka Ri Bhoi Synod College bad u trai jong ka Zong-hi-i Ryndia Production House. Ha kane ka jingïalang la don lang ruh u Samla Rubimon Syngkli, Secretary ka Umdihar Sports & Welfare Society, u Samla Marleki Syngkli, President ka Seng Samla Shnong Umdihar, ryngkat bad ki dkhot jong ka Seng Samla.
Haba ai jingkren, u Pastor Precious Timung u la ai jingïaroh ïa ka Seng Samla Shnong Umdihar halor ka jingshimkhia ban pynlong ïa kum kine ki jingïalehkai kiba ai mynsiem ïa ki khun samla. U la kyntu ruh ïa ki samla ba kin pynmlien ïa lade ha ki jingïalehkai bad ha kino kino ki sap kiba ki don, khnang ba kin ioh ïa ka met kaba koit ba khiah bad ka jingim kaba bha.
U la ai jingmut ruh ba ki samla kin kiar na ki jingmlien kiba sniew kum u drok bad ki jingdih buaid, bad ban pynleit jingmut sha ka jingtei ïa ka lawei kaba bha. Kum ka dak jong ka jingïasnohkti lang bad jingïamynsiem, u Pastor Precious Timung u la noh synniang da ka song pisa kaba T.25,000 sha ka Seng Samla na ka bynta ka jingrakhe ïa ka taïew lehkmen jong ka shnong.
