Jowai, Nohprah 15: Ka prokram ai dawai Pulse Polio Immunization kaba lai sngi ha West Jaiñtia Hills District la plie paidbah da ka kong Emelya Ch Momin, ka Assistant Commissioner, Jowai kaba la shim bynta ban ai dawai Polio sha ki khynnah ha Lumkyrwiang Urban Public Health Centre (UPHC), Jowai.
Ka kong Emelya Ch Momin haka jingkren kala ong ka prokram Pulse Polio ka dei ka jingthmu ba kongsan jong ka Ri ban ïada ïa iwei pa iwei i khynnah kiba hapoh san snem ka rta na ka jingpang poliomyelitis. Kala pynpaw ka jingsngewkmen ba la plie ïa ki jaka ai dawai polio ha kylleng ka District, kiba kynthup lang hapoh ki shnong ki thaw bad kane kala pynsuk ïa ki kmie ki kpa ban leit ai dawai ïa ki khun jong ki.
Shuh shuh kala pyntip shaphang ka kynhun kaba leit jngoh haduh ki ïing ki sem jong ki nongshong shnong bad ka jingpyntreikam ïa ki mobile booths ban pynthikna baroh ki khynnah ki dei ban ïoh dawai polio bad ban shngaiñ ka lawei.
Ka kong Momin kala ïaroh ïa ka jingtrei shitom jong ki nongtrei ka koit ka khiah, ki nongtrei ka Anganwadi, ki ASHA, ki Volunteer bad baroh ki tnad kiba don bynta ha kane ka prokram. Ka la kyrpad ruh ïa ki kmie ki kpa, ki nongïalam shnong bad ki paidbah ba kin ïatreilang ban pynthikna ba baroh ki khynnah ki dei hok ban ïoh ïa ki dawai polio.
Ka Dr. S. Surong, Pediatrician, MCH Panaliar, Jowai kala pynpaw ba ka jingpang Polio ka dei ka jingpang kaba lah ban pynïap ïa u briew bad ka long kaba shyrkhei kaba lah ruh ban ïalam sha ka jingpang bym lah shuh ban pynkhih (paralysis).
Kala ban jur ba ka jingai dawai ka dang long tang ka lad jingïada kaba lah ban leh naduh ka por ba dang rit lyngba kane ka prokram ai dawai polio jong ka sorkar.
Kala batai shuh shuh wat lada ki khynnah kila ïoh ïa ka dawai Polio katkum ka por bala buh na ka bynta jong ki, hynrei ki khynnah ki lah ban shim biang ïa ka dawai Polio ha kum kine ki prokram ba kyrpang khnang ba kin ïoh jingïada.
Na ka liang ka Dr. Helen J Uriah, Immunization Officer, WJH kala pyntip ba la buh ïa ki Polio booth ha kylleng ka District, kaba kynthup ïa baroh ki thaiñ bad ki shnong ki thaw ban pynthikna ba ki kmie ki kpa kin suk ban wanrah ïala ki khun jong ki.
Ha kane ka prokram ka Dr. P. Shylla, District Medical & Health Officer, WJH kala pynïaid ïa kane ka jingïalang, katba Dr. W. Suna, MO incharge Lumkyrwiang UPHC, Jowai ila ai ki kyntien ai khublei.
