Nongstoiñ, Jylliew, 11: Ka Mawliehbah Area Sports Association (MASA) ha ka sngi saitjaiñ, ka la ïoh ban plie ïa ka 1st League Cum Knockout Football Tournament 2023 ha Madan Mawliehbah Mawnar, ha kaba u Samla Wanteibok Lyngdoh General Secretary Hynñiewtrep Youths Council West Khasi Hills District u la long u Kongsan.
Ha katei ka sngi shwa ban plie ïa kane ka Tournament la ïoh ban pynlong ïa ka jingïalang, ha kaba u Bah Lovely Lyngdoh Vice President u la pynïaid ïa ka jingïalang. Hadien kane la ïoh ban kren na ki riew Rangbah jong ka thaiñ hadien kata la ïoh ka jingkren na u Kongsan Samla Wanteibok Lyngdoh, ha kaba u la ai khublei ïa ki nongkitkam ka Association.
U la kyntu ïa ki paidbah ki longkpa ki longkmie ki samla kynthei shynrang bad ïa ki khynnah, ba ka jingïalehkai sports ka dei kawei na ki lad ha kine ki sngi lada shimkhïa kan pyndap ïa ka jingdonkam. U la sneng la khraw ïa ki nongïalehkai ba ki dei ban long kiba Discipline bad kiar na ki jingdih ki bym tei kum u duma ka kyiad kiwei kiwei ki jingdih kiba pynsniew dur ïa ka jingim briew.
U la kyntu ruh ïa ki dei ban long kiba sngew rit wat bad kim dei ban buh ka jingsarong haba kiew ha ki jingïalehkai. U kyntu ruh ba ki dei ban kynmaw ba phiah ïa ka por da kaba kynmaw ruh ïa ka jingpule haba ki ïalehkai bad ka por ban trei. Khatduh u la kitbok ïa ki ar tylli kiba ïakhun ba kin leh bha bad kumjuh ïa baroh kiba wan ïashimbynta.
Hadien kane la ïoh ka jingai kren khublei lyngba u President Bah O.L.Diengdoh. Ha kane ka Tournament la wan ïashimbynta kumba 11 tylli ki Team kiba dei na ka thaiñ Mawliehbah Area bad ha ka jingïalehkai plie, la ïaleh hapdeng ka Mawliehdeiñ pyrshah ïa ka Umsaw ha kaba ka Mawliehdeiñ ka la thep haduh 4 kol pyrshah ïa Umsaw.
