Shillong, Lber 31: Ka Nokrek Tigers kala sdang da kaba khur jingjop ha ka lympung ïalehkai Senior Men Challengers Cup ba pynïaid da ka Meghalaya Cricket Association (MCA) da kaba pynliem da 50 ron pyrshah ïa ka Symper Panthers ha ka jingïakhun ha ka sngi Palei ha madan Polo.
Ha kane ka sngi na ka daw ka jingshah pynthut ha u slap, ïa ka jingïalehkai la pynhiar noh sha ka 35 over shilliang. Ka Nokrek kala jop ïa ka jingkynting pisa kala kam ban tied nyngkong, kaba dei ruh ka sien kaba nyngkong jong kane ka tournament ba baroh lai tylli ki team ha ki jingïakhun ba lah dep kiba la kam kawang bol nyngkong hadien ba kila jop ïa ka jingkynting pisa.
Kane ka rai ba la shim da u kapten u Sylvester Mylliempdah kadei ka sienjam kaba biang tam ïa ka kynhun ha kaba kala lah ban kamai 227 ron duh noh 8 wicket ha baroh 35 over.
Ka kynhun kala ïoh mynsiem bha ha kaba utei u kapten u la kamai marwei 64 ron da kaba khyrwit san tylli ki four bad tied lang bad u Krishna Thapa uba kamai 29 ron ha kaba ka Tigers ka kamai 75 ron ha ka jingduh noh 1 wiket ha ki 13.1 over.
U Anish Charak u kamai 65 ron na ki 37 bol kaba kynthup ïa lai tylli ki six bad hynñiew tylli ki four. Kane kadei ka sien kamai half-century kaba ar na bynta jong u ha kane ka tournament, hadien ba u la kamai 52 ron ha ka jingïakhun pyrshah ïa ka Myntdu Lions ha ka jingïalehkai ha ka sngi Nyngkong.
Na bynta ka Panthers, kaba dei ka sien mad rem kaba nyngkong, kiba khur wicket ki kynthup ïa u Md Nafees Siddique u khur 3 wicket ai kamai 39 ron ba kynthup ïa ka wicket u Charak, u Babloo Passah u ïoh 2 wicket ai kamai 20 ron bad u Himan Phukan u ïoh 1 wicket ai kamai 31 ron. Ka Nokrek kala shah pynthut ha u slap ha ka por ba ka wan ban tied hynrei ka suiñ bneng kala ailad bha na bynta ka Panthers, ha kaba sdang tied tang ha ki katto katne over.
Baroh ar ki kynhun kila ïalehkai bha ha kaba sdang tied, ha kaba u Kishan Lyngdoh uba dei ruh u kapten u kamai 27 ron bad u Tarique Siddique u kamai 51 ron ha ka jingduh noh 1 wicket. Ki nongtied ba lai bad ba hynriew ruh kila lah ban kamai ron, ha kaba u Swarajeet Das u kamai 26 ron, hynrei kane ka jingkamai ïoh ban kamai ron ka khlem neh slem na bynta ka Panthers bad ka dang donkam bun ka ron ban jop. Ka Tigers kala pyndonkam bha da ki rangkawang bol spin, kata ha ki over ba shapdeng bad seisoh ruh da kaba ïoh ban pynhap wicket. U Steve Syiemlieh u ïoh 3 wicket ai kamai 22 ron uba dei ruh u rangkawang bol ba khur bun wicket tam na bynta ka Tigers.
U Tarique u kamai half-century hynrei u la shah pynkhyllem noh hadien ba u la kynjoh sha katei ka jingkam ron, ha u Ram Gurung uba ïoh 2 wicket ai kamai 36 ron ha kaba ka Panthers kala shah pynkhyllem lut ki wicket bad kynjoh tang sha ka 177 ron.
U Mylliempdah u ïoh 2 wicket ai kamai 32 ron, u Thapa 1/33 bad u Charak 1/35. U Charak u ïoh ruh ban kem ar tylli bad khur ruh ïa ka khusnam Player-of-the-match.
Ka Symper Panthers kan hap ban mih madan biang ha kaba kan ïakhun pyrshah ïa ka Myntdu Lions mynta ka sngi Thohdieng ha ka por 9 baje mynstep.
