Shillong, Nailar 6 : Ka National Institute of Fashion Technology (NIFT), Shillong, ka la sdang ïa ka jingrakhe ïa ka Handloom Week jong ka mynta ka sngi da ka jingai jingkren u riew shemphang uba ai jingmut bad ai mynsiem u Dr. Rajani Kant, uba la tip paidbah kum u GI Man of India. Kane ka jingïalang ka dei ka sngi ba nyngkong jong ka jingrakhe kaba shi taiew kaba la aiti sha ka pateng ba riewspah jong ka India ha ka kam shna jain bad ki briew kiba pynneh pynsah ïa ka.
U Dr. Rajani Kant, ka nongïoh ïa ka khusnam Padma Shri bad General Secretary jong ka Human Welfare Association, Varanasi, u la ai jingkren sha ki samla pule bad ki nonghikai halor ka phang “Geographical Indications: From Local Craft to Global Identity.” Da kaba trei palat lai phew snem ha ki jaka nongkyndong bad ki nongtrei kti, ki nongthaiñ jaiñ, bad ki briew kiba shem jingeh ha kylleng ka ri India, u Dr. Kant u la wanrah ïa ka jingshemphang kaba kordor bha halor kumno ban ïada, kyntiew bad pynïaid ïew sha kylleng ka pyrthei ïa ki jingtip tynrai bad ki kam shna jingshna lyngba ka rukom treikam jong ka GI.
Ha ka jingai jingkren ba kongsan jong u, u Dr. Kant u la ïathuh ïa ka jingïaid lynti kaba ai mynsiem jong u naduh ki sngi ba nyngkong jong u ha Mirzapur, Uttar Pradesh, haduh ban da long ka sur kylleng ka pyrthei na ka bynta ka Intellectual Property Rights bad ka jingpynkupbor ïa ki nongtrei kti. Hapoh ka jingïalam jong u, palat 650 tylli ki aplikeshon GI la aiti ha kylleng ki 26 tylli ki jylla bad ki union territory, ha kaba 635 tylli ki mar ki la ïoh ïa ki GI tag haduh mynta. Tang ha ka thaiñ shatei lammihngi, 36 tylli ki mar ki la ïoh ïa ka kyrdan GI, ba kynthup san tylli na Meghalaya, u mawmer ba kongsan na ka bynta ka deiriti jong ka thaiñ bad ka jingkhyllie im ïa ka ïoh ka kot.
Haba pynpaw ïa ka jingïakynduh jong ka pateng, ka jingsaiñdur thymmai, bad ki lad kamai kajih ba ïaineh, u Dr. Kant u la ban jur ïa ka bor jong ka Geographical Indication ha kaba pynkupbor ïa ki shnong ki thaw, khamtam ïa ki kynthei bad ki samla, bad ban pynneh pynsah ïa ka jingstad tynrai ha ka pyrthei kaba la nang kiew stet, kaba ïahap bad ka “Mann ki Baat” jong u Myntri Rangbahduh, Narendra Modi. U la pynshlur ïa ka NIFT Shillong ban shim ïa ki lad ki lynti kiba don ha ka thaiñ na ka bynta ban ïada bad kyntiew ïa ka pateng kaba dei.
Ka kam jong u Dr. Kant ka la ktah ïa palat 2 million ngut ki briew, da ki sienjam kiba kynthup ïa ka jingpynkupbor ïa ki kynthei ha ka liang ka ïoh ka kot, ka pule puthi ïa ki khynnah, ka
jingkyntiew ïa ki sap, bad ka jingpynneh pynsah ïa ka mariang. Ki sienjam jong u ban pynïasoh ïa ki mar ha ka thaiñ bad ki ïew kylleng ka pyrthei lyngba ka jingithuh GI ka la pynlong ïa u ban ïoh shibun ki khusnam ha ka ri bad kylleng ka pyrthei, kynthup ïa ka khusnam National Intellectual Property Award 2017, Lokmat Samman 2018, bad ka jingïashim bynta ha ki jingïalang ba ha khlieh duh ba la pynlong da ka WIPO, UNESCO, bad ka Sorkar India.
U Director ka NIFT Shillong, Shankar Kumar Jha u la ong, “Ka jingaiti jong u Dr. Kant ha ka roi ka par ki jaka nongkyndong bad ka jingieit jong u ïa ki kam shna jingshna tynrai ka ai ïa
ka jingïohi jngai kaba khlaiñ na ka bynta ki samla pule jong ngi. Ka jingdon jong u mynta ka sngi ka la kyntiew ïa ka Handloom Week kaba don jingmut bad kaba seisoh.
Ka Handloom Week ha NIFT Shillong kan dang bteng haduh ka 13 tarik Nailar 2025, ha kaba ki don ki jingpyni live, ki exhibition, ki jingïakren ha ki kynhun, bad ki sienjam ba ïalam da ki samla pule ban pyni, ban rakhe, bad ban saiñdur thymmai ïa ka jingshna jaiñ jong ka India.
