Shillong, Naiwieng 04: Ki nongtrei jong ka skulbah NEHU kiba don hapoh ka shatri jong ka NEHU Non-teaching Staff Association (NEHUNSA) ha ka lah Sngi u Blei ki la pynlong ïa ka jingsangeh treikam ban pynbor ïa ki bor pynïaid jong ka skulbah NEHU ban pyndap noh ïa ki kam kiba thylli.
Ha ka jingïakren bad ki lad pathai khubor u President jong ka NEHUNSA u Dr. W.R Synrem u la ïathuh ba kane ka jingsangeh treikam jong ki nongtrei ka long halor ka jingmynthi jong ki nongpynïaid ka skulbah NEHU ki bym shym la lah ban pynlong ïa ka Written Test bad ïa ka Interview na ka bynta ki 154 tylli ki post ha ka Group B bad C mynta la jan shi snem kynthih.
U Dr. Synrem u la ïathuh, ka National Testing Agency (NTA) ka la phah da ka jingthoh sha ki bor pynïaid jong ka skulbah NEHU ba kam lah ban pynlong ïa ka Written Examination bad bthah ba ka NEHU kan hap ban pynlong hi ïa ka Written Test.
“Ka jingpynslem jong ki bor bahalor ban pynlong ïa ka Written Test bad ïa ka Interview ka la ban khia ïa ngi ki nongtrei namarba bun na ki nongtrei ki la shongthait bad tang mynta u snem 2024 ki don haduh 50 ngut ki nongtrei kiba la shongthait,” la ïathuh u Dr. Synrem.
“Ki kam kiba uwei u briew u trei tang kawei ka kam, hynrei mynta ngi la hap ban trei na ka bynta lai bad saw tylli ki kam. Kane ka pynkhia haduh katta katta ïa ngi ban pynbiang ïa ki jingdonkam jong ki nonghikai bad ki samla pule jong ka skulbah NEHU,” u la ong.
U la ïathuh ba ka jingkular jong ki bor pynïaid ban pynlong noh ïa ka Written Test kam shym la urlong wat hadien ba ki la pan por haduh ka 31 tarik u Risaw, 2024.
“Ngi sheptieng ïoh ba ka kut noh ka por jong ka Advertisement. Lada ka kut noh, kin leh kumno? Na kata ka daw ngi khot ïa kane ka jingïakhih,” u la bynrap.
“Kane ka jingsangeh treikam ka la pyndkoh ïa ki kam bad ïa ki samla pule namarba ki Bus kiba ju leit shaw bad leit on ïa ki samla pule ruh ki la sangeh tad haduh ba u Vice Chancellor un da khot ïakren bad ban pynbeit ïa kane ka kam,” la bynrap u Dr. Synrem.
Shuh shuh u la pyntip ba u Vice Chancellor jong ka skulbah NEHU u la khot ïakren ïa ki nongïalam jong ka Association lashai ka sngi Baar.
“Lada ka jingïakren ka long kaba seisoh ngin sa khot ïa ka General Meeting jong ka Association bad lada kam seisoh ngin hap ban shim biang da kiwei pat ki sienjam,” u la ong.
