Shillong, Nailar 06: Ka Shillong Premier League mynta u snem 2025 ka la sdang ha ka rukom kaba itynnad bad kaba shongkun bha ha kaba ka Nangkiew Irat SC ka la hap ban sei lut baroh ïa la ka bor ban wanphai nadien ban jop ïa ka jingïalehkai da kaba pynliem ïa ka Nongrim Hills S&CC da 3-1 kol ban sdang ïa ka samoi ïalehkai ba thymmai.
Dei lyngba u Caldolan Kharmawphlang (13’) ba ka Nongrim Hills ka la ïoh ïa ka kol lamkhmat hadien ba u la thep ïa ka kol da kaba pyndonkam hok ïa ka kabu kaba la wan na ka corner kick.
Hynrei ka Nangkiew Irat, kaba wan ha ka thup kyrdan Top 4 ha ka samoi ba ladep, ka la lah ban pynïakhaid shuwa ban kut ka kylla step hadien ka kol ba la kum thep hi da u rangïalehkai ka liang pyrshah ha ka minit kaba 41. Hadien nangta ka la thep sa ar tylli ki kol ha ka kylla miet lyngba u Jefferson Pakyntein (60’) bad u Himanshu Patil (62’).
Ka jingïalehkai ka la long hapdeng u slap uba jur jan baroh 90 minit. Shuwa ban sdang ïa ka jingïalehkai ki dkhot ba rangbah ka Shillong Sports Association, ki nongpynïaid ïa ka SPL, ba la ïalam da u President ka SSA u bah Banteidor Lyngdoh MLA ki la ai khublei ïa ki nongïalehkai bad ki nongkitkam.
U Himanshu u la dei ban ïoh pynkiar sharud da ka khlieh ïa ka bol pashat kaba thikna na ka liang kamon hynrei ka la ïaid lait na une u rangïalehkai ba dang shu soi thymmai jong ka Nangkiew Irat, hynrei kaba sngewsih ïa ka Nongrim Hills ka la shah pynïakhaid namar ka kol ba la kum bakla thep hi da u kapten u Bankit Nongrum.
Lah ban ong ba ka jingïakhun ha ka kylla step ka la long kaba ïaryngkat bor hynrei ka Nangkiew Irat ka la paw ba ka long kaba kham khlaiñ ha ka kylla miet. U Jefferson, uwei na ki samla ïalehkai uba la paw ha ka SPL 2024, u la thep ïa ka kol ban buh hakhmat ïa ka Nangkiew Irat.
Ka jingbakla kaba jur jong ki rangïalehkai ba shadien ka liang pyrshah, ka Nangkiew Irat ka la ïoh ïa ka kabu ban pynkhih ïa ka kol kaba lai ba la thep da u Himanshu ban pynthikna ïa ka jingjop.
Ka jingïalehkai jong kane ka lympung kan bteng biang ha kane ka sngi Palei ha kaba ka Sawmer bad ka kynhun ba wan ba ar (runners-up) ha ka SPL 2024 ka Mawlai kin ïatynjuh bor ha ka por 5 shiteng janmiet.
