Jowai, Nailur 28 : Ka lympung ïalehkai jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kala sdang mynta ka sngi Balang ha Kiang Nangbah Stadium, Jowai.
Ïa kane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar jong ka Association kaba la jam sha mynta u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Ha kane ka sngi sdang ïa ka lympung ïalehkai 1st Division ki ar kynhun kiba la wan ban aireng ki long ka Nangbah Iawmusiang pyrshah ïa ka Moosalyngkat, naka liang ka kynhun jong ka Nangbah Iawmusiang kala lah ban pynliem da 1-0 kol ïa ka Moosalyngkat.
Haba phai sha ka jingïakhun hapdeng kine ki ar kynhun kala long kaba ïakhaid bha na baroh arliang. Ka jingïakhun hapoh ka por jong ka kylla step ym shem ladon kiba ïoh ban pynkih jar, hynrei dei hashwa ban kut jong ka jingïakhun jong ka kylla miet ka Nangbah Iawmusiang kala thep ïaka shikol lyngba u Manchester Thubru haka minit ba 89 bad kala jop syndon tang shikol.
Ka jingïakhun lashai ka sngi 29.09.2022 kan long hapdeng ka Chilliangraij SC pyrshah ïa ka Mukhla Raij SC haka por 2 baje shiteng jong ka nohphai sngi.
