Shillong, Nohprah 12: Ka Meghalya Softball Association (MSA), ha ka 12 tarik Nohprah (sngi Palei) ka la ïoh ban sdang ïa ka lympung ïalehkai ka ba la tip kum ka 4th Senior Softball Championship 2024 – na ka bynta ki khynnah kynthei bad shynrang, ba la pynlong ha Don Bosco Mini Stadium, Shillong.
Mynta ka kynti ki kynhun kiba la wan ïashim bynta ki kynthup ïa 7 tylli ki District jong ka jylla.
Ha katei ka sngi la wan ban plie pyrda ïa kane ka lympung da u Principal jong ka St Anthony’s Higher Secondary School, u Fr. Anthony Kharkongor kum u Kongsan, ha ka jingïadon ryngkatlang u President ka synjuk, u Dr Aman War bad kong Rida Lyndem – General Secretary kiba la pdiang burom ïa u Kongsan. Kiwei pat kiba la donlang ha kane ka sngi plie ki kynthup ïa ki dkhot ka executive committee jong ka MSA.
Lah ban kdew ba ka jingpynlong ïa kane ka lympung ka long shi bynta ka jingpynkhreh shuwa ban ïoh pynlong ïa kane ka jingïalehkai ha ka lympung bah ka jylla, ka Meghalaya Games ka ban long ha sorbah Jowai, West Jaintia Hills District ha u snem ban wan.
Kane ka lympung kan long na bynta lai sngi lynter, ha kaba kan kut ha ka 14 tarik mynta u Nohprah, 2024.
Related Posts
Hadien ka jingïalang plie, ka jingïakhun kaba nyngkong ka la long hapdeng ka Mawkyrwat South West Khasi Hills pyrshah ïa ka Dkhiah na East Jaintia Hills.
Ki kynhun la phiah ha ar tylli ki Group (A bad B) ha kaba kawei ka Group ka kynthup saw tylli ki kynhun katba kawei pat lai tylli.
Ka thup kynhun jong ki shynrang ki long: Group-A; Mawsynram kaba la mihkhmat na East Khasi Hills, ka Nongpoh na Ri-Bhoi, Nongstoiñ na West Khasi Hills bad ka Jowai na West Jaintia Hills. Na ka Group-B ki kynhun ki long ka Dkhiah na East Jaintia Hills, Mawkyrwat na South West Khasi Hills bad ka Mairang na Eastern West Khasi Hills.
Na ka liang ki kynthei, Group-A ki long: Jowai-WJH, Mawkyrwat-SWKH, Nongstoiñ-WKH bad ka Mairang-EWKH. Na ka Group-B ki kynhun ki long : Nongpoh-RBD, Mawsynram-EKH bad ka Dkhiah-EJH.