Shillong, Nailur 29: Ka kynhun ïalehkai jong ka Meghalaya Police ka la ïoh ban sdang ïa ka lympung phutbol First Division Football league 2025 jong ka Shillong Sports Association da ka jingjop kaba shyrkhei, ha kaba ka la pynjemkhnap ïa ka Nongrah SC da 6-0 kol ha ka jingïalehkai kaba la long hynne ka sngi Nyngkong ha madan SSA Stadium-First Ground, Polo.
U Pynshailang Lyngkhoi (46′, 69′) bad u Bansiewdor Wahlang (85′, 90′) ki la ïoh ban pynkhihjar mar ar sien na ka bynta ka kynhun ha kane ka jingïalehkai, katba u Lalintus Marak (15′) bad u Chesterfield Nongdhar (90’+1) ki la ïoh ban thep kawei.
Ka Meghalaya Police ka la long ka lahduh jong ka Second Division ha u snem ba ladep bad ka la ïoh ban kiew sha ka lympung First Division mynta u snem.
Ka jingïalehkai ha kane ka sngi Baar kan long hapdeng ka Mawtawar SC pyrshah ïa ka Mawkhar SC ha ka por 1:30 baje noh phai sngi.
