Shillong, Jymmang 03: U Myntri Rangbah ka jylla u Conrad K Sangma ha ka sngi Ba-ar ula plie paidbah ïa ka lympung ïalehkai Meghalaya Games 2022 ha madan First Ground jong ka SSA, Polo, Shillong, ha ka jingïadonlang u Myntri ki kam ïalehkai u Bah Banteidor Lyngdoh uba long kum u symbud kongsan.
Haba ai jingkren ha kane ka sngi, watla hapdeng ka jingbym biang bad ka jingdkhoh ha kaban pynbit pynbiang na ka bynta ka jingdonkam jong ki nongïalehkai u Myntri Rangbah u la ai ka jingïaroh ïa ka MSOA kaba la trei shitom ban pynlong ïa kane ka lympung.
“Ki don shibun ki jingeh bad kam dei tang na ka jingbym lah ban pynbiang hynrei ngi dei ban ïaroh ïa ka MSOA kaba la trei shitom ha ryngkat ka tnad sport,” la ong u Myntri Rangbah.
Haba kyntu ïa ki nongïalehkai ba kin long kiba ryntih, u Myntri Rangbah u la ong, “Kane ka khyllipmat ka hikai na bynta jong phi kiba kumno phin kylla long bad ban pynjanai ïa ka jinglong kaba don hapoh jong phi. To ïalehkmen, kane ka long ka jinghikai na bynta jong phi bad barobor pyndonkam ïa ka jinglong ryntih.”
U Mynti Rangbah u la pynbna ruh ha kane ka sngi ba ïa ka Meghalaya Games yn pynlong beit manla u snem bad ïathuh ba ha u 2023 yn pynlong ha Tura, ha u 2024 ha Jowai. “Ïa ka Meghalaya Games yn pynlong beit manla u snem bad ngi la ïapyrkhat ban pynlong ha Tura, ha Jowai bad da kane kan ïarap ban kyntiew ïa ki nongïalehkai ka jylla bad ruh ban nang pynïar ïa ka jingdon ki jaka ïalehkai.”
Shwa kane na ka liang u Bah Banteidor Lyngdoh haba kren kum u symbud kongsan u la pynpaw ka jingsngewdiaw halor ka jingbym lah jong ka MSOA ban pynbiang ïa ki jingdonkam na ka bynta ki nongïalehkai kiba la kynduh jingeh shwa ban sdang ka jingïalehkai la ka long ha ka bam ka dih, ki jaka sah bad kiwei kiwei. U la kyntu ruh ïa ka MSOA ba kadei ban pynbeit ïa kaei kaba la jia khnang ba kum kine kin ym wan jia shuh. U la pynpaw ruh ka jingsngewkmen ba hadien ar snem la lah biang ban pynlong ïa kane ka lympung bad kyrmen skhem ba lyngba kane ka lympung kin mih shibun ki nongïalehkai kiban mihkhmat ïa ka jylla ha ki jingïalehkai national bad wat haduh ki lympung international.
“Ngi la ïamir jingmut bad u Myntri Rangbah ban pynkhie im biang ïa ka Meghalaya Games ha u snem 2020 namar ngi da thrang ban kyntiew ïa ki jingïalehkai bad kumjuh ruh ïa ki nongïalehkai,” ong u Bah Banteidor Lyngdoh.”
“Ngi donkam ban ai kaba bha tam na bynta jong ki nongïalehkai khnang ba kin poi sha ki kyrdan ba kham shalor. Ka jingdon jong ka Meghalaya Games ka ai lad na bynta ki nongïalehkai ba kin pynpaw ïa ki sap ïalehkai bad khamtam ban don ka mynsiem ïalehkai ha ryngkat ka jingïatreilang jong ki state associaiton.”
Na ka liang u Bah John F Kharshiing Working President ka MSOA u la ai khublei ïa ka sorkar MDA kaba la kyrshan borbah ban pynlong ïa kane ka lympung. “Watla bun ki jingeh hynrei ngi ïoh ruh ki jinghikai. Kiba bun ki nongïalehkai ki dap da ka jingsngewkmen ban wan ban ïashim bynta ha kane ka lympung.”
U la ai khublei ruh ïa ki nongïalehkai kiba la ïatreilang watla hapdeng ka jingbym biang hynrei u la kular ban nang pynjanai shuh shuh nangne shakhmat.
“Nga dap da ka jingsngewkmen ba phi la ïoh ban ïashim bynta ha kane ka jingïalehkai bad nga shanñiah haphi ba phin ïalehkai naduh ka mynsiem. Ka jingsdang jong phi na iba rit kan ïalam ïaphi sha ka kyrdan ba hakhlieh ha ka lawei ïalehkai jong phi,” ong u Working President ka MSOA.
Ha kane ka sngi la ïadonlang ruh u Bah Eugeneson Lyngdoh MLA ka Mawphlang uba dei ruh u President jong ka SSA, Bah Finely Pariat General secretary ka MSOA, ki ophisar ka tnad Sports and Youth Affairs, ki nongkitkam jong ki state association, ki kmie ki kpa jong ki nongïalehkai nalor kiwei kiwei.
La pynkut ïa kane ka sngi plie pyrda da kaba shim smai bala ïalam da ka samla Wandahunshisha Mawblei kaba dei ka thei ïalehkai Karateka kynsai jong ka MKA. Ha kane ka sngi la pynshongshit ruh da ki jingrwai bad ki jingshad tynrai.
