Shillong, Ïaïong 18: Ka kynhun ïalehkai football jong ka jylla Meghalaya kala sdang ka jingïaid lynti jong ka da ka nam jop ha ka Santosh Trophy (National Football Championship) da kaba pynliem da 3-2 kol pyrshah ïa ka Rajasthan ha ka jingïalehkai na ka ka Group A ha ka sngi Nyngkong ha Kottappadi Football Stadium, Kerala.
Ha kane ka jingïalehkai dei ka Rajasthan kaba la thep nyngkong lyngba u Youraj Singh, hynrei ka Meghalaya kaba la ïakhun tyngeh kala wan urlong lyngba u Figo Syndai uba la thep syndon ar kol ha ka jingïakhun jong ka kylla step bad lamkmat da 2-1 ïa ka Rajasthan ha kaba kut jong ka kylla step.
Haba wanphai sha ka kylla miet, ka jingïakhun hapdeng kine ki ar tylli ki team kala nang shongshit bad ïathnem bha, khamtan hadien ba ka Rajasthan kala ïoh ban pynïakhaid lyngba ka kol ba la thep da u Imran Khan. Watla kala shah pynphai, hynrei ka kynhun ïalehkai jong ka jylla Meghalaya kala trei shitom khlem da kynran dien bad ïakhun tyngeh beit triang ban pynphai kol. Bad lyngba kane ka mynsiem ïakhun bad da ka jingïapashat bol kaba itynnad bha, kala pynlong ïa ka Meghalaya ban ïoh ka kabu thep kol lyngba ka penalty. Kumta u Hardy Cliff Nongbri uba dei ruh u kapten haba wan ban bahkhlieh ïa katei ka penalty ha ka minit ba 64, khlem da pynlehnoh ei u la thep beit jlang ïa ka bol hapoh ka jar.
Kumta ka kynhun kala nang pynskhem khamtam ha ka liang ka bynta ba shadien bad khlem da ailad ïa ki jingpyrshang thep kol ki rangïalehkai ka Rajasthan ha kaba haduh kaba kut kala khur syndon ïa ka nam jop da 3-2 kol.
Ka Rajasthan kala mad nam rem arsien ha kane ka group ba donlang ki lahduh barim ba kynthup ïa ka West Bengal, Kerala bad Punjab.
Ka Meghalaya kan pynkhreh pat ban aireng pyrshah ïa ka Kerala ha ka sngi Balang ha ka por 8 baje janmiet.
