Shillong, Naitung 19: Ki nongwad bniah na ka Meghalaya Climate Change Centre (MCCC), ka sorkar jylla ki la pynlong ïa ka jinglum jingkheiñ bad wad bniah ïa ki jaka kiba shah ktah ha ka jingkylla ka suiñbneng kiba kynthup ïa ki 39 tylli ki Community & Rural Development Blocks ka Meghalaya. Kane ka jinglum jingtip kadei halor ka phang, “Integrated climate vulnerability assessment of Meghalaya at block level”, kaba la shon ruh ka article wadbniah ha ka Discover Sustainability, ka lad pathai khubor ba la pynmih da ki ri Europe kaba long katkum ka Springer Nature Group.
Kane ka jinglum jingtip ka pynpaw ïa ka jinglong batlot ha ki 25 tylli ki C & RD Block ha ka jingshim ba ki la don ha ki kyrdan kiba halor kaba lam sha ka jingtlot ka ïoh ka kot jong ki longïing, ka jingbym biang ki jaka sumar kum ki Anganwadi centre, bad ki jingduna ki khlaw ki btap bad kiwei pat ki daw.
Kane ka jingthoh halor kane ka jingwad bniah ka pynpaw ïa ka jingdonkam ban shimkam da ki nongthaw aiñ, kyrpang na ka bynta kito kiba don bynta ban pynwandur ïa ka jinglong ka suiñbneng, ki kam pynroi sha ki thaiñ nongkyndong, bad ka jingïaryngkat kyrdan ha ka ïoh ka kot bad kaba ryntih ruh ha ka imlang sahlang ha Meghalaya.
Ïa ka MCCC, la thaw hapoh ka National Mission for Sustaining the Himalayan Ecosystem (NMSHE), Department of Science & Technology, ka sorkar India, bad kaba treikam hapoh ka Planning, IP&SD Department, ka sorkar Meghalaya, bad kaba trei ïa ka kam kum ka technical unit hapoh ka Meghalaya Basin Development Authority, kaba dei ka Secretariat jong ka Meghalaya State Council on Climate Change & Sustainable Development bad kaba la khmih bad ai buit da u Director General, Dr Joram Beda, IAS, Commissioner & Secretary (II), Planning, IP&SD Department, ka sorkar Meghalaya.
