Shillong Jymmang 30: Ka Meghalaya Chess Association, East Khasi Hills district ka la sdang ban pynlong ïa ka 7th East Khasi Hills district Selection Chess Tournament 2025 kaba arsngi kaba la sdang ha ka Sngi Thohdieng bad kan kut ha ka Sngi Saitjaiñ ka 31 tarik.
Ha kane ka tournament ki la don palat 80 ngut kiba la ïashimbynta bad ha kaba la plie ïa kane ka jingïalehkai da u Co Chairman ka M.I.D.C ka sorkar jylla u Bah Ransom Sutnga uba long ruh ha kajuh ka por u Rangbah Shnong ka Dorbar Shnong Mawkhar ha ka jingïadonlang u President Bah K M Warjri, u Secretary Bah J K Pajait, nangta u Chief Arbiter ka MCA u Biju Singh nalor ki nongïalehkai bad ki kmie ki kpa.
Haba kren kum u kongsan u Bah Sutnga u la ong ba ka jingïalehkai chess kadei kaba eh bha bad don ruh kiba ong ba kito kiba tbit ïa kane ka jingïalehkai kidei ruh kiba triem bha ha ka Mathematics, hynrei kane kam dei kumta namar mano mano ruh ki lah ban ïashimbynta.
U la pynpaw ka jingkmen ban ïohi ba ki khun samla naduh ki hep kiba rit haduh ki samla Rangbah ki la ïashimbynta bad kane kan ïarap ban sei ïa ki player kiba tbit.
“Nga kwah ba na kane kane ka tournament yn sa don kiba lah ban poi sha ka jingjop naba kane ka jingïalehkai kan pynsuk ïa ki khun samla ba kin ïoh ban ïashimbynta ha kiwei pat ki rynsan ba kham shalor la ka long ha ka jylla, ban mih khmat ïa ka jylla Meghalaya bad kumjuh ruh ïa ka ri baroh kawei,” ong u Bah Ransom Sutnga.
Na ka liang jong u, u la ai ruh ka jingïarap da ka song pisa sha ka association ba kan lah pyntyllun ïa ki kam.
La ïoh ruh ïa ka jingkren na u Chief Arbiter ka MCA bad la pynïaid ïa ka prokram plie da u secretary ha kaba u kongsan u la pynbna ba ïa kane ka tournament la sdang ha kane ka sngi.
