Sdang ka lympung karate Inter School ba heh tam jong ka jylla Meghalaya

Shillong, Naitung 24: Ka lympung ïalehkai Karate kaba 31 jong ki skul kaba la tip da ka 31st State Level Inter School Karate Tournament 2025 ka la sdang hynne ka sngi ka 24 tarik Naitung, 2025 da ka jingwan ki nongïashim kaba bun tam ha ka histori jong kane ka lympung.
Ha ka rekod ki don 350 ngut ki nongïalehkai karate kynthei bad 392 ngut ki shynrang kiba la pynrung kyrteng ïalade ban ïashim bynta ha kane ka lympung ïalehkai mynta u snem, kiba mihkhmat ïa ki 104 tylli ki skul na Khasi-Jaiñtia Hills bad Garo Hills.
Ha u snem ba ladep ki don 609 ngut ki nongïashim bynta, kaba la long hi ka rekod haduh ba kane ka lympung ba mynta u snem kan da pynpra ïa katei ka rekod. Kane ka pyni ba ka jingsngewtynnad ïa ka jingïalehkai karate ka la nang kiew bad ba ka jingpyrshang jong ki coach, ki skul bad ki jaka pule ka la nang seisoh.
Ïa kane ka Championship kaba lai sngi lynter la pynlong da ka All Meghalaya Karate-Do Association [AMKA] ryngkat ka jingkyrshan jong ka Directorate of Sports and Youth Affairs ha Multipurpose Indoor Hall kaba don ha SAI Centre ha ka jaka pule jong ka skulbah NEHU, Shillong.
U kongsan ha kane ka sngi plie pyrda ïa kane ka lympung u dei u Deputy Inspector General of Police (Eastern Range) u Davis NR Marak IPS, ha ka jingïadonlang u Working President ka Meghalaya State Olympic Association (MSOA) u Bah John F Kharshiing kum u symbud kongsan.
U Davis NR Marak u la pynbna paidbah ban sdang ïa kane ka lympung hadien ba ka Esaranaki Kharjana kaba la khur ïa ka takma rupa na ka bynta ka Meghalaya ha ka national cadet tournament ha Dehradun ha u bnai ba la dep, ka la bam smai na ka bynta baroh ki nongïalehkai karate.
U Davis NR Marak, uba ïalade ruh u dei u nongïalehkai uba tbit bha, khamtam ha ki rynsan ïakop siat, u la ïaroh ïa ka AMKA ba ka dei kawei na ki synjuk ïalehkai kaba heh bad kaba trei shitom bha ha Meghalaya.
“Nga ai khublei ruh ïa ka AMKA kaba la pynlong ïa kum kane ka lympung kaba heh – 104 tylli ki skul kam dei kaba kai bad ka dei ka sakhi ïa ka jingtrei shitom bad ka jingaiti lut jong ki dkhot ka AMKA ba la wanrah lang ïa kane da kaba jop,” u la ong da kaba ai burom ruh ïa ka jingpyrshang jong ki coach bad ki kmie ki kpa kiba la kyrshan ïa ki khynnah ban shimkhia ïa kaei kaba ki jingsngewtynnat.
Katba na ka liang jong u Bah John F Kharshiing, haba ai jingkren ula kdew ïa ka National Games 2027 kaba la jan, ha kaba ka jylla Meghalaya kan pdiang ban pynlong ïa ka. U la ong ruh ba ka MSOA ka khmih lynti ïa kiei kiei kiba khraw na ki nongïalehkai karate ka Meghalaya ha katei ka lympung bad kiwei pat. U Bah John u la bynrap ruh halor ka jingmyntoi na ka bhah bai bam (scholarship) jong ka sorkar jylla bad ka khusnam pisa ïa ki nongïalehkai kiba jop ha ka ban kyrshan ban pynroi ïa ka Sports ha ka jylla.
Ha kajuh ka por, ka AMKA ka la shim ïa kane ka kabu ban pynkup burom ïa ki nongïalehkai karate bad ki coach kiba la wanrah nam bad burom ïa ka jylla Meghalaya da kaba jop ha ki lympung ïalehkai bapher bapher ha kine ki bnai ba la dep.
Napdeng jong ki la kynthup ruh ïa ka Kynjailin Lyngdoh Mawnai, kaba la khur ïa ka takma rnong na ka bynta ka ri India ha ka 9th South Asian Karate Championship ha Colombo, Sri Lanka dang shen ha une u bnai.
Kiwei pat ki nongïalehkai karateka kiba la shah pynkup burom ha kane ka sngi ki long: Ferdinand Samkupar Rani, Gideon Tympuin, Gregorwilson Makdoh, Larisha Kurbah, Esaranaki Kharjana, Daphishisha Shadap, Royal Jayden Laloo. Na ka liang jong ki coach ki long: Donboklang Lyngdoh, Sunil Rathee, Rodrick Syiem, Edwilbert Kyntiewbor Nongkynrih bad Ester Mary Lyngdoh.