Nongpoh, Lber 30: Kum shibynta ba ki khynnah skul kin ioh ban pynproh ïaka jingmut jingpyrkhat nalor ka pule puthi jong ki ba kila pynlut por haki saw kynroh jong ki kamra klas, ka skul Umpathaw Secondary School hynin ka sngi kala sdang ban pynlong da ka lympung ïalehkai sports ba 3 sngi ki khynnah skul naduh kiba dang rit haduh kiba la san kaba long ruh kum ka rynsan ba ki khynnah kin ioh ban pynpaw pyrthei ïaka sap ïalehkai kaba ki don.
Ïa katei ka lympung la leit ruh ban plie pyrda ïa ka da u Samla Shining Kyntla Finance Secretary ka Confederation of Ri-Bhoi People kum u kongsan haka jingdonlang u Samla Dines Nengnong, ki bor pynïaid skul ki nonghikai lem bad ki khynnah skul kiba la ïashim bynta haki jingïalehkai bapher bapher naduh ka march pass, mass drill bad ki jingmareh thong bala phiah haki house bapher bapher.
Haba kren ha katei ka sngi naka liang u Bah Shining Kyntla kum u kongsan u la ai ka jingkhublei ïaki bor pynïaid skul kaba la lah ban pynlong ïa kum katei ka jait prokram kaba long shibynta naka pule ka puthi ba ki khynnah ki ioh ban lehkai ban ban pynproh ïaka jingmut jingpyrkhat hadien ba kila pynlut bun ka por tang haka jingpule bad ka donkam ruh ïaki khynnah ba kin ioh ban lehkai kaba long kum ka rynsan pat ba kin ioh ban pynpaw pyrthei ïaka sap ka phong kaba ki don kaba iarap ruh ban kyntiew ïaki skul kiba don ïaki khynnah kiba donsap.
Naka liang jong u, u la kyntu ruh sha ki khynnah ha katei ka sngi ba kin long ki khynnah kiba minot bad kheiñ kor ïaka jingnang jingstad khamtam ha kane ka juk ba mynta ba baroh baroh ki ïabeh ïaki jingnang jingstad hynrei kum ki khynnah ki dei ban nang ban bate ïaka por ka jong ki nalor ka sap kaba ki don ba kin ïaid ryngkat ka sap bad ka jingpule jong ki khnang ba kin poi sha ka thong kumba ki angnud haka jingim jong ki.
