Nongpoh, Jylliew 24 : Ka lympung ïakura ba nyngkong eh ha Ri-Bhoi bala tip kum ka Ri-Bhoi Boxing Cham-pionship 2022 kaba dei ka lympung ïakura ba 2 sngi bala pynlong da ka Ri-Bhoi Boxing Association haka jingïatreilang bad ka ophis u District Sport Officer Ri-Bhoi District kala sdang mynta ka sngi ha NSCA Indoor Stadium ha Umlyngkdait Nongpoh.
Ha kane ka lympung ïa kura lawan ban ïashim bynta daki kynhun bapher bapher jong ka them Ri-Bhoi bad ki kynhun shimet kiba hap hapoh ka Ri-Bhoi District Boxing Association.
Ïa katei ka lympung la wan ban plie pyrda da u Arpit Upadhyaya Deputy Commissioner ka Ri-Bhoi District kum u Kongsan ha ka jingdon ryngkat lang ka kong Marian Maring kum ka Symbud Kongsan, u Giri Prasad Superitendent of Police Ri-Bhoi District, u Bah Bobby L Nongbet DSO ka Ri-Bhoi District, Bah Mathew Makdoh Working President NSCA, Sumarlang Swer President ka Ri-Bhoi Boxing Association bad kiwei kiwei ki riew rangbah.
Na ka liang u Bah Sumarlang Swer kum u la ong ba kum u President u dap da ka jingsngewkhia ban iohi ba ki rang bad thei ïalehkai ka Ri-Bhoi ki duna ka jingshim bynta haka Meghalaya Games kaba dang shu pynkut shen kaba la pyn pyrkhat ruh ba lehse ka dei ka jingbym don ki rynsan bad ki lympung ban lum ban lang ïaki rang bad thei ïalehkai hapoh ka district kaba kum ka Association kala shim ïaka sienjam ba nyngkong ban rai pynlong kum katei ka lympung kum ka rynsan ban sei ïaki rang bad thei ïakura kiba kynsan ban mih naka district sha kiwei kiwei ki lympung ba heh haka jylla bad kumjuh ruh shabar jylla.
Shuh shuh u la ong ba kane kadei ka sien ka ba nyngkong ba la ioh ban pynlong ïa kum kane ka lympung bad kin dang ïaleh ban pynlong man u snem naka bynta ka jingmyntoi jong ki khun samla bad u la pyntip ruh ba haka 25 tarik kan don ka jingïakhun jong ki Army Personnel (Exhibition Match) naka bynta ban pyni ïaka rukom ïakhun jong ki rang ïakura ba tbit bad kynsai, u la bynrap.
