Shillong, Nailur 28 : Ka Boxing Association of East Khasi Hills District ha ka sngi Balang ka la sdang ïa ka rynsan ïakob ïakura kaba la tip ïa ka kum ka East Khasi Hills District & State Ranking Men and Women Boxing Championshi.
Ïa katei ka lympung ïalehkai ba la pynlong ha ryngkat ka Meghalaya Boxing Association (MBA) la pynlong ha madan ïalehkai jong ka shnong Umlyngka, Upper Shillong. Ïa katei ka lympung la lah ban pynlong lyngba ka jingïarap pisa ïa ka lyngba ka District Sports Promotion Society bad ka ka ophis jong Deputy Commissioner jong ka East Khasi Hills District.
Ïa katei ka lympung la plie pyrda ïa ka da u BDO ka Mylliem Block u Bah Andrew L. Myrthong kum u kongsan ha ka jingdonlang u Rangbah Shnong ka Umlyngka u Bah Stephan Lyngdoh.
U Bah Andrew haba kren kum u kongsan u la pynpaw ka jingsngewkmen ba un ïadon bynta lang ha katei ka sngi ban ïoh ban ïa kren shibun bad ki rang ne ki thei ïa kura kiba la poi ban wan ban ïashim bynta sha kane ka jingïakob.
“Ka jingïalehkai ka dei kaba donkam ha ka jingim jong u briew, namar ba kam ai ha u briew tang ïa ka met kaba koit ba khiah hynrei ka ïarap ruh ban tei ïa katta ka jinghikai kaba naduh ka mynsiem,” ong u Bah Andrew.
Kumta na ka liang Bah Andrew u kyrmen skhem ba lyngba kane ka jingïakob, kaba ki khun samla ki ïoh ban ïashim bynta ha kum kane ka kynti kaba mynta kan ïarap shuh shuh ban bsut ha ka jingmut jingpyrkhat ïa kane ka mynsiem ïalehkai. Haba ïadei bad ka jingpyntrei kam ïa ka State Sports Policy, u Bah Andrew u ïathuh ba ha kane ka mat treikam, ka boxing kadei kawei na ki jait jingïalehkai kaba ka sorkar ka la khreh ban ailad ïa ka ba kan kiew hangne hapoh ka jylla.
“Dei lyngba ki rynsan ïakhun ba kum kine, nga khmih lynti ba ka jylla kan dang lah ban sei bad ban pynmih ïa ki nongïalehkai kiba kynsai ne ki khlur na kane ka jylla bad ha ka por ba phin mih khmat ïa ka jylla phin da lah ban wanrah ïa ka nam ka burom ïa ka ïing ka sem, ka kur ka jait bad ïa ka jylla hi baroh kawei,” la ong u Bah Andrew.
Ha kane ka sngi plie pyrda la ïa ki jingïakob kiba dei jong ka quarterfinal, bad ki nongjop ha kane ka jingïakob ki long u Bakitbgoklang Nongpyiur bad u Marshal Thongni ha ka 48kg ki shynrang, ha ka kyrdan ïakhun jong ka 51 kg kiba long ki nongjop u Kapil Barman, u Banjop Nongkhlaw lem bad u Khrawbok Marweiñ, katba ha ka kyrdan ïakhun kaba 54 kg ki nongjop ki long u Gaurav Chettri, Wicky Mawlong, bad ha ka kyrdan ïakhun ba 57 kg u nongjop u dei u Sunday Ch Sangma bad ha ka kyrdan 60kg nongjop dei u Biangbok Umbah.
