Nongstoiñ, Ïaiong 19: Ka Basketball Association of West Khasi Hills ha ryngkat ka jingïatreilang jong ka ophis District Sports Officer Nongstoiñ, ka Meghalaya Basketball Association lem bad ka Shillong Labet, ha ka sngi ba ar jong ka taiew, ka la plie pyrda ïa ka lympung 1st Inter School Basketball Tournament 2022 ha madan Basketball Court New Nongstoiñ.
Ha kane ka lympung, ki la don kumba 6 tylli ki kynhun bapher bapher ba kynthup ïa ki san team na ka liang ki shynrang bad hynriew team na ka liang ki kynthei. Ka jingthmu jong kane ka lympung hi ka long ban sei bad ban nang kyntiew ïa ka sap ka phong ïalehkai Basketball jong ki samla pule jong ka dong ka thaiñ.
Ha kane ka sngi sdang la ïa donlang da I kongsan kong Balarina Syiem District Sports Officer Nongstoiñ lem bad kiwei de ki riew pawkhmat, nangta ki nongïalam ka Association, ki nonghikai bad ki khynnah skul.
Na ka liang I kongsan ha shuwa ban pynbna ïa ka jingplie ïa kane ka lympung, I la pynpaw ïa ki kyntien ai khublei bad kitbok sha baroh ki nongïashimbynta bad sha ki nongïalam jong ka Association ba kin nang leh bha na ka por sha ka por. I da ban jur ruh kyrpang ïa ki khynnah skul halor ka jingdonkam ban shim bynta ha ki kam ïalehkai, namar ka long kaba kongsan tam ryngkat ruh bad ki jingpule.
Na ka liang ka Basketball Association of West Khasi Hills, ha kane ka sngi ka la pynkup burom kyrpang ruh ïa u samla Alfred Marbanïang u ba dei u National Referee (B Panel) ba nyngkong duh na West Khasi Hills District. Na ka lïang ki nongïalam ba kynthup ïa u Bah Donald Nongsiang President rangbah bad Secretary Bah Wallambok Ïawphniaw, ki la pynpaw ïa ki kyntien khublei ba kyrpang ïa u ne u samla ba nyngkong eh na kane ka District u ba la ïoh ïa kane ka kyrdan.
