Nongpoh, Nohprah 08: Kum ka jingpynkhreh ban pdiang ïaka jinglehkmen Khristmas kaba dei ka sngi jong ka jingwan long briew u khyllung Jisu sha kane ka pyrthei, ka FKJGP Tyrso Circle mynta ka sngi kala sdang ïaka lympung ïalehkai 1st FKJGP Christmas Cup Football Tournament 2022 ha madan ïalehkai ka shnong Tyrso.
Ïa katei ka lympung la wan ban plie pyrda da u Bah Arkin Khonglam Sports Secretary ka FKJGP sengkmie kum u kongsan, haka jingdonlang u Bah Hilary Shadap President ka FKJGP Tyrso Circle lem bad kiwei kiwei ki riew rangbah bad ki dkhot jong ka FKJGP.
Haba phai sha katei ka jingïakhun plie pyrda ha katei ka sngi, ka jingïaleh kala long hapdeng ka Mawrathud SC pyrshah ïaka Nangiaikiew SC ha kaba ka jingïalehkai kala long kaba itynnad bad shongshit ha kaba baroh ar kynhun kila pyni ïala ki jong ki sap ki phong, hynrei hapdeng ka jingïakhun kaba jur ka Mawrathud SC kala ioh ban pynkhih nyngkong ïaka jar haka minit kaba 20 hynrei haduh ba kut ka kylla miet ka Nangiaikiew SC kam shym la lah shuh ban pynphai.
