Shillong, Nailar 02: Ka shi kol na u Wadjied Kynsai Ryngkhlem ka la biang pura ïa ka kynhun ba ïalehkai hala ïing, ka Shillong Lajong ban khur pura ïa ki lai point ha ka sngi sdang ïa ki jingïalehkai na ka Group F jong ka 133rd IndianOil Durand Cup ba la pynlong ha Jawaharlal Nehru Stadium, Polo, Shillong hapdeng u slap. Kane ka dei ruh ka sien ba nyngkong ïa ka Lajong ban wanphai ha madan ïalehkai jong ka JN Stadium naduh u snem 2018, bad lah ban kdew ba ka kynhun ka la lah ban ïalehkai bha.
Ha kane ka jingïakhun u Head Coach ka Shillong Lajong, u Jose Hevia u la pynïalehkai 4 ngut ha bak, 3 ngut hapdeng bad 3 kiba turkhmat (4-3-3 formation) ha kaba u rangïalehkai na Brazil, u Marcos Rudwere Silva u la ïalehkai shakhmat.
Kane ka kynhun ba ïalehkai hala ïing ka la ïoh ban lamkhmat tang hadien 7 minit bala ïaid ka por watla ka kynhun na Nepal ka la ïoh ban tehlakam bun shah ïa ka bol mar ïasdang. U Wadjied Ryngkhlem u la shem ïa kane ka kol hadien ba ka bol ba u la shut ka la ïaid lait shuwa na katto katne ki bak ka liang pyrshah shuwa ban rung shapoh kol.
Baroh ar tylli ki kynhun ki la pyrshang katlah katïai ban pyntyllun ïa ka bol shakhmat ha ka jingpyrshang ban pynkhihjar katba ka jingïalehkai ka dang ïaid, hynrei dei ka Shillong Lajong kaba la lah ban shna ïa kiba bun ki kabu. Lah ban kdew ba ka Lajong ka la dei ban khur ïa ka jingjop kaba suk ha kane ka jingïalehkai, hynrei namar ba kim shym la lah ban pynurlong ïa kine ki kabu ka la hap ban hun da tang katei ka shi kol. U Hardy Cliff Nongbri, Everbrighton Sana bad u Marcos Rudwere Silva ki la duh ïa ka kabu ksiar ban pynkhihjar.
Ha kawei pat ka liang, ka Tribhuvan Army ka la hap ban ïalehkai kyrshan bak bad apthap ïa ka kabu ban rah kyndit kyndit ïa ka bol shakhmat ha kaba ka la ïoh katto katne ki khyllipmat kiba kane ka kynhun ka la jan ïoh ban pynphai. U Basant Jimba u la pynsyrwa ïa ka kabu kaba paka shuwa ban kut ka kylla step hadien ba u la rah ïa ka bol satang ban pyllait lyngba u rangapkol ka liang pyrshah.
Ka Shillong Lajong ka la bteng ban pynkhlaiñ shakhmat ha ka kylla miet bad thaw ïa shibun ki kabu hynrei watla kata ruh, kam shym la lah ban pynurlong ban shem ïa ka kol kaba ar.
Lah ban kdew ruh ba ka jingtbit u rangapkol ka Tribhuvan, u BikeshKuthu ka la khanglad ïa ka Lajong ban pynkhihjar biang sa kawei. Ha kawei pat ka liang, u Manas Dubey, rangapkol ka Shillong Lajong u la lah ban ïada na ka bol ba la shut da u Basant Jimba ban dang buh ïa ka kynhun hakhmat. Ka Shillong Lajong ka lah ban jam shaduh kaba kut ka jingïalehkai khlem kano kano ka jingeh, ban lehkmen ïa ka sieng wanphai jong ka ha Jawaharlal Nehru Stadium da ka namjop.
