Shillong, Nailur 21: Ka Laitkor SC ka la sdang ïa ka Meghalaya Women’s State League 2025 da ka jingjop kaba paka ban pynliem noh da 6-2 kol ïa ka Na Rympei Football Academy ha ka jingïalehkai ba nyngkong ban plie pyrda ïa kane ka lympung ba nyngkong eh jong ki kynthei ha ka jylla baroh kawei ha madan First Ground-SSA Stadium, Polo, ha ka janmiet jong ka sngi Saitjaiñ.
Ka Iaraplang Nongrum jong ka Laitkor ka la ïoh hat-trick ha kane ka jingïakhun, da kaba pynkhihjar ha ka minit kaba 16, 29 bad 53. Ki paralok jong ka, ka Inrila-i-dor Khongthaw (48′, 72′) bad ka Darishisha Kharlyngdoh (90’+4) ki la ïoh ban kyntiew ïa la ka jong ka kyrteng ha ka thup ki nongpynkhihjar, katba ka Pynhun Shulet (28′, 90′) ka la ïoh ban thep ïa baroh ar tylli ki kol na ka bynta ka Na Rympei.
Ïa kane ka lympung, ka dei ka jingthmu jong ka Meghalaya Football Association, la plie paidbah da u Myntri ka tnad ïalehkai jong ka Sorkar Jylla, u Wailadmiki Shylla, ha ka jingïadon lang ki heh nongïalam jong ka MFA, ba la ïalam da u President u Bah Hamletson Dohling bad u General Secretary u Bah Sunesh Syiem, bad ki dkhot nongïalam jong ki District Association kiba ladep ïasoh bad ka MFA.
Haba kren shuwa ban sdang ïa ka jingïalehkai, baroh arngut u President ka MFA bad u Myntri ka tnad ïalehkai ki la kren halor ka jingjop kaba ai mynsiem jong ka kynhun ïalehkai phutbol ka ri India, ha kaba dang shen ka la ïoh rung sha ka AFC U-20 Women’s Asian Cup. Kawei na ki thei ïalehkai jong ka Meghalaya, ka Ribansi Jamu ka la don byntalang ha katei ka kynhun bad baroh arngut u bah Wailadmiki bad u Hamlet ki la pynpaw ka jingkyrmen ba kin dang don shuh shuh ki nongïalehkai na ka jylla kiban sa phong da ka jingsngew sarong ïa ka jersey jong ka ri ha ki por ban wan.
U Myntri ka tnad ïalehkai u la ong ruh ba ka sorkar Meghalaya ka angnud ban pynbha ïa ki jingtei ha kaba ïadei bad ki kam ïalehkai bad ruh ban kyrshan pisa ïa ki nongïalehkai lyngba ki scholarship bad ki khusnam kumba la buh ha ka Sports Policy bad ïa ka jingshisha jong kane lah ban ïohi ba ka jylla ka don ïa ka mang tyngka kaba heh tam na ka bynta ka kam ïalehkai ha ka thaiñ shatei lammihngi jong ka Ri India.
Na ka liang u President ka MFA, u la pynkynmaw ba dang shen ka synjuk ka la pynbna ïa ka jingai khusnam pisa kaba la pynlong aiñ na ka bynta ki nongïalehkai phutbol kiba mihkhmat ïa ka kynhun ïalehkai jong ka ri ha ki kyrdan bapher bapher.
Lah ban kdew ba lyngba ka sap kaba la don lypa bad ka jingtrei shitom jong ki, ki thei-ïalehkai phutbol ka Meghalaya ki la mad shibun ki jingjop ha kaba ïalehkai na ka bynta ki klob ha ka ri bad ruh ha ki kynhun ïalehkai jong ka ri India. Ka MWSL ka dei shi bynta jong ka jingthmu jong ka MFA ban kyntiew shuh shuh ïa ka phutbol jong ki kynthei ha ka jylla, ban ai jaka ïa ki nongïalehkai ban tyngshaiñ bad ki lad ki lynti ban kiew shaphrang ha ka phutbol. Ki don 13 tylli ki kynhun kiba la soi ban shim bynta ha kane ka league ba nyngkong na ki 8 tylli ki synjuk district ba la ïasoh bad ka MFA, bad la khmihlynti ba kin dang don bun ki ban ïashim bynta ha ki sienjam ban wan.
Haba phai biang sha ka jingïalehkai ba nyngkong, ka jingïakhun ka la long kaba ïaryngkat bor ha ka kylla step, hynrei ka Laitkor ka la tehlakam bha ïa ka bol ha ka kylla miet. Ka Laitkor ka la long ka lahduh jong ka Shillong Sports Association’s Women’s League 2024, katba ka Na Rympei ka dei ka lahduh ha ka lympung jong ka Ri-Bhoi District Sports Association.
Ka Iaraplang ka la ïoh ban pynkhihjar ar sien ha ka kylla step, ha kaba baroh ar sien ka nongap kol jong ka Na Rympei ka Rikyntiew Diengdoh ka la ïoh ban pyndei tiak da ka kti hynrei kam shym la lah pat ban khanglad ïa ka bol ban rung sha kol. Hapdeng jong kitei ki kol, ka Pynhun ka la pynïakhaid shipor na ka bynta ka Na Rympei ha ka 28 minit bad ka kylla step ka la kut da 2-1 kol.
Ka Laitkor ka la nang pynskhem ïa ka jingjop da kaba pynjlan ïa ka kol lamkhmat da 5-1 kol lyngba ka Inrila-i-dor, kaba la thep ar kol ha ka 48 bad 72 minit, nangta ka kol kynjoh hat trik jong ka Iaraplang ha ka 53 minit.
Ka Pynhun ka la ïoh ban thep biang sa kawei na ka bynta ka Na Rympei, shuwa ba ka free-kick ha ki minit pynjlan ba khatduh jong ka Darishisha kan pynkut ïa ka jingjop kaba paka na ka bynta ka Laitkor.
Ka jingïalehkai kaban wan jong ka MWSL kan long ha ka Group C ha ka 25 tarik Nailur hapdeng ka Diengshynrum SC pyrshah ïa ka Chirupheiwi Nongkynrih FC ha Khliehriat. Ka jingïalehkai kan sdang ha ka por 2 baje nohphai sngi. Kine ki dei tang ar tylli ki kynhun kiba don ha ka Group C bad kumta kin ïakhun markylliang ha ka rukom ïalehkai ha la ïing bad shabar. Ka kynhun kaba don ha khlieh duh kan rung sha ka Quarterfinal.
