Shillong, Risaw 04: Ha ka Sngi Thohdieng (04 tarik Risaw, 2024) ka Laban Sports Club ka la ïoh ban sdang ïa ka lympung ïalehkai Table Tennis kaba la tip da ka 3rd Meghalaya Open Table Tennis Cash Prize Tournament 2024, ka ban ïaid ar sngi lynter haduh 05 tarik Risaw (Sngi Saitjaiñ) ha Laban Sports Club Indoor Hall, Shillong.
La plie pyrda ïa kane ka lympung da u President ka Raid Laban Dorbar Pyllun u Bah I. Sunn ha ka jingïadon ryngkatlang ki dkhot nongkitkam ka Laban Sports Club lem bad kiwei kiwei de, kynthup ruh ïa ki nongïalehkai.
Ha kane ka jingïalehkai la phiah ïa ki nongïashimbynta ha ki kyrdan bapher bapher, kiba kynthup ïa ka: U-13 Boys & Girls Single; U-15 Boys & Girls Single; Men & Women Single; Men’s Double; Veteran Men’s Single (45 snem shajrong); Veteran Men’s Doubles (45 snem shajrong).
Kane ka lympung ym tang ba ka kular ïa ki jingïalehkai kiba itynnad na ka bynta ki nongpeitkai hynrei ka long ruh ka rynsan kaba kongsan na ka bynta ki nongïalehkai kiba ïakhun shitom ban pynkhreh ïalade ban poi sha ki kyrdan ba kham shalor, bad ka ban kyntiew ïa kane ka jait jingïalehkai ha kane ka thaiñ.
Related Posts
Ha kane ka lympung la wan ïashimbynta kumba 100 ngut ki nongïalehkai table tennis na jylla bad kymjuh ruh kiba nabar, kata naduh Assam, West Bengal, Delhi bad Tripura.
Haba ai jingkren halor kane ka lympung, na ka liang jong u Bah Samy Myrthong u pynpaw ba ka long kaba donbok ba mynta ka kynti ha kane ka lympung la wan ban ïashimbynta ruh ki nongïalehkai kiba na shabar jong ka jylla, kum na Assam, West Bengal.
“Ka jingwan ïashimbynta jong ki nongïalehkai kiba nabar kan plie lad ïa ki khynnah lehkai ka jylla ban sei pynpaw pyrthei ïa la ka jong ka jingtbit bad ba kin lah ban kynjoh ïa ka kyrdan ïalehkai kumba long lem kiwei pat ki khynnah lehkai (table tennis) na kiwei pat ki jylla.
Ha kaba ïadei bad ka song khusnam u Bah Sammy u la pynpaw ba ïa mynta ka kynhun kam pat lah ban ai ka khusnam pisa kaba heh hynrei kan pyrshang katba lah i bor ban ai ka song khusnam ryngkat bad ka trophy.
Ka Laban Sportc Club, kaba dei kawei na ki klob kaba la rim bha jong ka jylla (Meghalaya) ba la seng naduh u snem 1906. Ka klob ka la pynpaw ïa ka jingkwah ban ïoh pynlong ïa kane ka lympung man la u snem ryngkat ka jingkyrmen ba hadien habud kan ïoh ban ïatreilang bad ka sorkar ban nang kham pynjanai shuh shuh ïa kane ka lympung.