Sdang ka jingtei ïa ka Rain Museum ha Mawsynram ban khring ïa ki nongjngohkai pyrthei

Shillong, Risaw, 24: Ka jingshna ïa ka Rain Museum ha ka shnong Mawsynram ka la ïaid shakhmat ha kaba u kontraktor u la sdang ïa ka jingtrei, la pyntip u MLA ka Mawsynram Constituency Bah Olan Sing Suin ha ka sngi Palei.
U Bah Suin u la pynpaw ba ka jingkyrmen ba kane ka projek kaba kot T.25 klur tyngka yn sa lah ban pyndep noh hapoh 18 bnai.
Tang shu dep shna ïa ka Rain Museum, la khmilynti ba kan long kum ka Information Centre na ka bynta ki nongjngohkai pyrthei kiba leit kai sha Mawsynram, bad kan long ruh ka projek ka ban rah ïa ka nam ka bud jong ka shnong Mawsynram kum ka shnong kaba jur slap tam ha ka pyrthei.
“Kan long kum ka kyrteng kaba pawnam na ka bynta Mawsynram Constituency,” la ong u Bah Suin.
“Tang shu dep shna pura ïa ka Rain Museum, kan sa wanrah ruh ïa ka dur ba thymmai sha ka jylla Meghalaya,” u la bynrap.
U Bah Suin u la pynkynmaw ruh ba donkam ruh ïa ka surok kaba bha khnang ban kyntiew ïa ki kam jngohkai pyrthei hapoh ka Constituency.
U la ong ba ka jingmang piba dang shen na ka bynta ban shna pynbha ïa ka surok kan sa wanrah ïa ka jingsuk ha ka leit ka wan sha Mawsynram bad kane kan pynsuk ruh ïa ki nongjngohkai pyrthei ban leit kai sha Mawsynram.
“Ka shong beit ha ka jingbha ka surok,” la ong u Bah Suin.
“Haba nga leit sha ka constituency jong nga, namar ka jingsniew palat ka surok phim ym kwah hi ruh wat tang ban shong kali. Hynrei da ka jingmang pisa ba dang shen, ka jinglong jingman jong ka surok nangne shakhmat kan sa pynkylla dur bad kan sa ïarap ruh ban kyntiew ïa ki kam jngohkai pyrthei ha ka Constituency.”
Katkum ka jingong jong u, ka jingshna pyndep ïa ka Rain Museum bad ka jingshna pynbha ïa ka surok la khmihlynti ba kan pynkylla dur ïa ka Mawsynram Constituency, khnang ba kan khring ïa ki nongjngohkai pyrthei.
U Bah Suin u la pynpaw ruh ïa ka jingshaniah ba kine ki projek yn sa lah ban pyndep ïa ka por ba la buh bad ba kan wanrah ruh ïa ki jingkylla dur hapoh ka Constituency.