Nongpoh, Naiwieng 06: Ka bor district jong ka Ri-Bhoi haka jingsnohkti lang jong ki tnad sorkar bapher bapher mynta ka sngi kala sdang ïaka jingrakhe ïaka Jal Utsav ka prokram ba 15 sngi lynter naka bynta ban pynneh pynsah bad sumar ïa ka um, ki tyllong um bala pynlong da ka NITI Aayog haki 20 tylli ki Aspirational District bad Aspirational Blocks haka ri naduh ka 6 tarik haduh 20 tarik Naiwieng 2024.
Ïa katei ka jingsdang ïa katei ka jingrakhe la pynlong ha Iewmawlong Treatment Plant bala wan ruh ban plie pyrda da u Abhilash Baranwal Deputy Commissioner ka Ri-Bhoi District haka jingdonlang ka Iffat Parvin State Nodal Officer ka NITI Aayog, u bah MB Tongper ADC, Bah U Kurbah EE PHE Nongpoh, Bah K Lyngdoh EE Water Resource and Irrigation, u LPD Arengh Divisional Officer Soil and Water Consertvation Nongpoh bad kiwei kiwei ki ophisar naki tnad sorkar bapher bapher ryngkat ki khynnah skul bad ki nongïalam shnong.
Haba kren maitphang ha katei ka sngi u Bah U Kurbah EE ka tnad PHE u la ong ba katei ka prokram ka dei ka thong jong u Myntri Rangbah duh ka Ri u Narendra Modi bad la pyntreikam ruh haki 20 tylli ki Aspirational District haduh 15 sngi lynter haka jingïatreilang bad ka Jal Jeevan Mission naka bynta ban pynneh pynsah ïaka um bad ki tyllong umdih.
U Abhilash Baranwal kum u kongsan haba kren ha katei ka sngi u la ong ba ka jingpynneh pynsah ïaka tyllong um ka long kaba kongsan haduh katta katta, khamtam kiba bun naki shnong ki mad ïaka jingkyrduh um kaba shyrkhei bad bunsien wat ka um ban dih ki hap ban shu thied bad phah wanrah na kiwei ki jaka.
U la ong ruh ba ka jingpynneh pynsah ïaka umbam ka umdih kam long kaba seisoh lada ki paidbah kim ai ka jingïatreilang bad kane ka long kaba kongsan ha man la ki shnong ban pynjop ïa katei ka thong.
U la ai ruh ka jingïaroh ïaka NITI Aayog kaba la shim ïa katei ka sienjam ban pynlong ïa katei ka prokram haki Aspirational District ban pynsngewthuh paidbah halor ka jingkordor ka um bad kumno ban sumar bad pynneh pynsah ïaki tyllong um.
Ha katei ka sngi naka liang ki khynnah skul, ki ophisar ki longkmie naki SHGs bad ki nongïalam shnong kila shim ruh ka bynta ban bam smai naka bynta ban pynneh pynsah ïaka um.
