Nongpoh, Naiwieng 14: Ka tnad Transport jong ka sorkar jylla ryngkat ka jingïatreilang bad ka Ministry of Civil Aviation mynta ka sngi ka la sdang ïa ka jingpyrshang ban pyntreikam ïa ka liengsuiñ duriaw kaba ban hiar ha um bad her ruh sha suiñ (Sea Plane) ha Water Sports Complex ha Umïam, ka ban sa pyntreikam ha ka jylla ban kyntiew ïa ka kam jngohkai pyrthei bad ban pynsuk ïa ki paidbah ba leit ba wan sha ka jylla lyngba ka skhim RCS-UDAN.
Ïa katei ka jingpyrshang ban pynher ïa ka liengsuiñ duriaw kaba la shna da ka De Havilland Aircraft jong ka ri Canada bad kaba la pynïaid da ka SpiceJet la wan ruh ban sakhi da u Ram Mohan Naidu Kinjarapu, u Myntri ka tnat Civil Aviation, u Conrad Sangma u Myntri Rangbah ka jylla Meghalaya, u Sniawbhalang Dhar, Symbud Myntri Rangbah, u Damanbait Lamare MLA ka Umroi, ki heh ophisar na ka tnad Civil Aviation bad kiwei kiwei ki heh sorkar ki la ïadonlang ha kane ka sngi.
Haba kren ha katei ka sngi na ka liang u Ram Mohan Naidu Kinjaparu Myntri ka tnad Civil Aviation u la pynpaw ba ka long kaba donkam bad kongsan ban don ka jingïatreilang ka sorkar jylla bad ka sorkar pdeng ban pynheh bad pynïar ïa ka jingpynher ïa ki liengsuiñ, bad ai jingïaroh ruh ba ka jinglah ban wanrah ïa kitei ki liengsuiñ ban lah ban hiar ha um bad her ha suiñ ha ka juh ka por ha Meghalaya ka dei namar ba don ka jingïadei ba jan ka sorkar jylla bad ka sorkar pdeng ban kyntiew ïa ki kam jngohkai pyrthei, khamtam ban wanrah ka lad ïohkam ïohjam, ban pynsuk ïa ki paidbah ban leh ki kam kamai khamtam ki jaka ba jynjar bad eh ban poi.
Kane ka jingsdang noh ban pyntreikam ïa ki liengsuiñ duriaw ha ka jylla Meghalaya lyngba ka jingdon ka pung Umïam ka dei namar ka jingïoh mynsiem na ka jingseisoh jong ki helicopter kiba rit kiba lah ban kit briew ha kylleng ki jaka jong ka ri bad kaba kongsan ka long ba kitei ki liengsuiñ duriaw ki long ruh ka jingmyntoi ha ka por ba donkam kyrkieh, ban pynpoi ïa ki tiar sha ki jaka ba eh ban poi bad khamtam ban kyntiew ïa ka kam jngohkai pyrthei kum ha ka jylla Meghalaya.
“Ka kam jngohkai pyrthei kadei kawei ka lad ban pynkiew ïa ka ri bad kumjuh ruh ha ka jylla Meghalaya bad lyngba kine ki liengsuiñ kan nang pynïar bad pynkhlaiñ shuh shuh ïa ka kam jngohkai pyrthei ba ki briew na kylleng ka ri ki lah ban wan poi ha kane ka jaka lyngba ki liengsuiñ,” la ong u Myntri da kaba bynrap ruh ba ka jingpynheh ïa ka Umroi Airport ka long kaba kongsan mynta kumba ka sorkar ka dang don hapdeng ka lynti ban pynheh khnang ba ki liengsuiñ kiba heh ruh ki lah ban hiar ha katei ka kad liengsuiñ.
U Conrad Sangma kum u Myntri Rangbah ka jylla u la pynpaw ba kane ka dei sienjam ba ka sorkar ka la shim ban kyntiew ïa ka kam jngohkai pyrthei ha ka jylla bad ban pynsuk ïa ki nongleit nongwan khamtam ban pynïasoh bad pynjan ïa kiwei kiwei ki jylla sha ka jylla Meghalaya lyngba ki surok suiñ.
U la ong ruh ba kawei na ki jingkylla kaba khraw ha pung Umïam ka dei ba ka sorkar ka don ka jingthmu ban tei da ka 7-Star Resort ha ki snem ban wan bad kyrmen ban long ruh kawei na ki resort ba itynnad tam ha ka thaiñ Shatei lammihngi namar ka jinglong jingman bad ka jingitynnad jong ka jaka bad lyngba ka jingdon jong kitei ki liengsuiñ um kan long ka jingkyrkhu bad ka jingkmen ïa ki nongwan jngohkai pyrthei ban nang kyntiew ruh ïa ka ïoh ka kot ka jylla.
U la ong ruh katkum ka kaiphod jong ka Skyscanner ka nongbah Shillong ka la knieh kham shakhmat ban ïa ka Azerbaijan’s Baku ban long ruh kum kawei na ki jaka jngohkai ba wan shakhmat ban khring ïa ki paidbah shuwa u snem 2025.
U la ong ruh ba bun na ki paidbah ki beiñ ki khoh ïa ka sorkar ba ka pynlong ïa ki tamasa bapher bapher ha ka jylla, hynrei u la ong ba kane ka dei ka lynti kaba jngai ban ïaid ban kyntiew ïa ka kam jngohkai pyrthei khamtam ka ïoh ka kot jong ki paidbah ka jylla bad kumba long mynta kumba 700 tylli ki ïing basa ba thymmai ki la mih ha ka jylla ban kyntiew ïa ka kam jngohkai pyrthei bad khamtam ban kyntiew ruh ïa ka ïoh ka kot ki paidbah bad kane ka dei ka jingthmu bad ka jingangnud jong ka sorkar bad kyrmen skhem ba kine ki liengsuiñ ba dang pyrshang pynher bad ki ban sa treikam ha ka jylla kan wanrah ka jingkylla bad ka jingkiew ha ka kam jngohkai pyrthei baroh kawei.
