Sdang ka jingpynkhreh ïa ka elekshon MDC ha GHADC, 4 tarik yn pyllait ïa ka Draft Electoral Roll

Shillong, Kyllalyngkot 30: Ka Sorkar Meghalaya kala pynmih ïa ka jingpynbna ïa ka Tarik ban pynkhreh ïa ka thup kyrteng elekshon ha baroh ki Constituency ka Garo Hills Autonomous District Councils (GHADC) hashwa ban pynlong ïa ka elekshon MDC sha Garo Hills Autonomous District Council (GHADC)
Katkum ka jingpynbna paidbah kaba la pynmih da ka Tnad District Council Affairs (DCA), ïa katei yn pynïaid shakhmat hapoh ka Rule 129 jongka Assam and Meghalaya Autonomous Districts (Constitution of District Councils) Rules, 1951 kumba lah dep ban pynkylla. Kane ka jingtreikam kan long shi bynta ban pynkhreh ïa ka jingpynlong ïa ka elekshon jong ka District Council hadien ba ka samoi treikam jongka kan sa kut noh.
Katkum katei ka jingpynbna, ïa ka Draft Electoral Roll yn pyllait ha ka 4 tarik u Rymphang. ïa ka jingkam bad jingpyrshah ne ka Claims and Objections yn lah ban ujor ha ka 18 tarik u Rymphang bad yn pynkut ne pynbeit ïa kane ka jingkam bad jingpyrshah ha ka 23 tarik u Rymphang. ïa ka Electoral Roll kaba pura yn sa pynmih ha ka 6 tarik u Lber.