Jowai, Nailar 01: Ïa ka prokram ban sdang pynïasoh lang ïa u Aadhaar number bad ka Electoral Roll la pynlong mynta ka sngi ha DC’s Conference Room, Jowai ha kaba u Additional Deputy Commissioner (Election) u P.K. Boro ula plie paidbah ïa kane jingthmu jong ka sorkar hapoh ka West Jaintia Hills District
Ha kane ka sngi la wan ban ïadonlang da ka kong DD Syngai, Additional Deputy Commissioner, u M A Challam, Extra Assistant Commissioner bad u bah W.K Kharbuli, u President ka Synjuk ki Waheh Shnong Jowai Urban u ma Alan Niangti, ki nongmihkhmat na ki Seng Saiñ Hima Sima bapher bapher, ki sahep sorkar bad ki nongtrei jong ka Election Branch Jowai.
U Boro haba ai jingkren ula ong ba ka Election Commission jong ka ri India kala shim ïa kane ka jingthmu khnang ban kiar na kano kano ka jingbakla ha ki Electoral Roll bad ban ïoh ïa ka jingthep vote kaba khuid bad lait na kano kano ka kynrum kynram.
Ula ong ruh ba ka jingpynrung Aadhar hapoh West Jaiñtia Hills ka dang duna haduh katta katta bad haduh mynta dang don tang 60% kiba la dep ban pynrung ïalade ha u Aadhar. Na ka liang ka sorkar jylla bad ka UDAI kila don jingthmu ban pynlong ïa ka prokram ba 100 sngi na ka bynta ban pynrung Aadhar iï ki paidbah, ryngkat ka jingpyrshah ban pynïasoh ïa u Aadhar bad ki EPIC jong ki nongthep vote. Kumta ula kyntu ïa ki paidbah ban ïasnohkti lang bad kane ka jingthmu jong ka sorkar.
Na ka liang ka kong D.D. Syngai kaba la ai ïa ka jingkrensdang kala batai ïa ka jingthmu jong kane ka prokram bad pyntip ba kane ka jingpynïasoh ïa u Aadhar bad ka EPIC ka dei kaba la leh katkum ka jingbthah na ka Election Commission jong ka ri India. Ka ïathuh ruh ba kane ka jingpynïasoh kan long katkum ka mon sngewbha jong u ne ka nongthep vote bad kan long ruh kaba jar jar bad kaba buhrieh na ka jingtip paidbah.
Kumta ka kyntu ïa baroh kiba la don ïa u Aadhar ba kin sngewbha ban pynpoi ïa u Aadhaar number jong ki hapoh ka 31 tarik u Lber 2023 khnang ba ka ophis kan ïoh leh ïa kaba donkam. Kala ïathuh ruh ba ïa kane ka kam la sdang ha baroh ki Polling Station hapoh ka District bad ka khot ruh ïa ka jingïatreilang ki paidbah baroh.
