Nongstoiñ, Rymphang 05: Naduh u bnai Naiwieng jong u snem ba la dep haduh kine ki sngi, ka dei ka aïom kaba ryngkhiang bad ka jingryngkhiang ka lah ban dang bteng sa kumba ar bnai tam nangne shakhmat. Ha kine ki lai bnai kynthih ym shym la don slap wat tang khyndiat ruh kumba long ha kiwei ki snem.
Ka jingrang tyrkhong haduh kine ki sngi ka la buh jingeh haduh katta katta ïa ki paitbah, namar la jan baroh ki tyllong um ba pynpoi um bam umdih sha ki shnong ki thaw ki la sdang ban rngad. Haba phai ha kane ka bynta ym lah ban len ba ka jingsdang ban rngad jong ki tyllong um, ka dei ka jingleh hi jong ki nongshong shnong ha kaba ïa ki khlaw ki btap la pynsynlen lut ïa ki lum la thang dusmon, ka jingtih pathar ïa ka khyndew ka la ktah haduh katta katta ym tang ïa ki tyllong um hynrei ka jingkhluit ka mariang ruh ka la nang kiew na ka snem sha ka snem.
Ha kaba ïadei bad ka jingpynbiang um bam um dih ha ki shnong ki thaw, ka sorkar pdeng ka la theh jingïarap da ki spah klur ban pyntrei kam lyngba ka Jaal Jeevan Mission. Hynrei kumba ka long mynta ki pipe bad ki jaka pynlang um ki tyrkhong, ki paitbah ki ud ki nam bad ki kynnoh ba ka sorkar kam lah ban pynbiang um bam um dih. Katei ka jingkynnoh ka dei tang ka jingkren khlem nongrim namar haba ki tyllong um ki rngad ka sorkar kam lah ban shna um.
Haba phai pat halor ka jingsdang rngad jong ki tyllong um ka la idei ba ïa ka umbam um dih sha ki shnong ki thaw, la dei ban den ïa ki wah ba kham heh bad ring um da ki kynja mashin kumba la leh ha wah Kynshi ban pynpoi um bam um dih ha ki shnong kiba hap hapoh ka Nongstoiñ Townn area. Nalor kata lada phai ha West Khasi Hills ki don bun ki wah kiba lada den ïa ki bad ring um da ki mashin baroh ki shnong hapoh ka district kin ym kyrduh satia ïa ka um bam um dih.
